Abaidyń 180 jyldyq mereitoiy qarsańynda qolǵa alynǵan «Abaiǵa qurmet» respýblikalyq aktsiiasy aiasynda Abai oblysynda aýqymdy qurylys jumystary júrgizilýde. Prezident Qasym-Jomart Toqaevtyń qoldaýymen bastalǵan bastamaǵa elimizdiń barlyq óńirleri, ulttyq kompaniialar men iri investorlar atsalysyp jatyr. Bul týraly Abai oblysynyń ákimi Berik Ýáli málimdedi, dep habarlaidy ult.kz.
Abai oblysynyń ákimi Berik Ýálidiń aitýynsha, «Abaiǵa qurmet» respýblikalyq aktsiiasy aiasynda elimizdiń ár óńiri oblysqa bir-bir nysannan tartý jasap jatyr. Onyń sózinshe, bul – tutas qazaq halqynyń uly oishyl Abaiǵa jáne onyń týǵan jerine degen erekshe qurmetiniń belgisi.
«Qazir atalǵan aktsiia aiasynda birneshe nysannyń qurylysy bastalyp ta ketti. Aktsiiany alǵashqylardyń biri bolyp Mańǵystaý oblysy qoldap, Semei qalasyndaǵy jańa ákimshilik-iskerlik ortalyqta Dostyq úiiniń qurylysyn bastady. Qaladaǵy Beibitshilik aralynda Soltústik Qazaqstan oblysynyń syiy – Rámizder alańynyń, al qalanyń sol jaǵalaýynda Aqtóbe oblysynyń tartýy – Jekpe-jek saraiynyń qurylysy qarqyndy júrip jatyr. Osylaisha, «Abaiǵa qurmet» aktsiiasy aiasynda jańa shaǵyn aýdan ǵana emes, oblys ortalyǵynyń ár aýmaǵy abattandyrylyp, jańa kelbetke enedi.
Al keshe jańa ákimshilik-iskerlik ortalyqta úsh birdei nysannyń qurylysyna bastaý berdik. Olar – Shymkent qalasynyń syiy Shyǵarmashylyq ortalyǵy, Almaty qalasynyń tartýy – Mediaortalyq jáne Pavlodar oblysynyń syiy – Ústel tennisi ortalyǵy», – deidi Berik Ýáli.
Joba aiasynda Túrkistan oblysy kórme ortalyǵyn, Qyzylorda oblysy «Anaǵa taǵzym» ortalyǵyn, Atyraý oblysy «Abai álemi» ortalyǵyn, Jetisý oblysy Semei qalasynyń kireberisine qala qaqpasyn turǵyzady. Sondai-aq Batys Qazaqstan oblysy sport keshenin, Qostanai oblysy rýhaniiat ortalyǵyn, Astana qalasy «Keleshek» mektebin salýdy josparlap otyr. Shyǵys Qazaqstan oblysy Ertis ózeniniń jaǵalaýyn abattandyrý jumystaryn júrgizedi.
Budan bólek, Shymkent qalasy shyǵarmashylyq ortalyǵymen qatar Semei qalasynyń Vodnyi kentine Mádeniet úiin tartý etpek.
Ákimniń málimetinshe, aktsiiaǵa ulttyq kompaniialar men iri investorlar da belsendi qatysýda. Máselen, «KAZ Minerals» kompaniialar toby jańa ákimshilik-iskerlik ortalyqta stadion qurylysyn qolǵa alǵan. «Samuryq-Qazyna» qory Mirnyi kentinde dene shynyqtyrý-saýyqtyrý keshenin salýda. Al «Qazaqstan halqyna» qory Inkliýzivti sport ortalyǵyn, «Qazaqstan temir joly» ulttyq kompaniiasy dene shynyqtyrý-saýyqtyrý keshenin, «QazMunaiGaz» ulttyq kompaniiasy Bolashaq saraiyn salýdy josparlap otyr.
Oblys ákimi bul bastamany Abai eline kórsetilgen erekshe qurmet pen el birliginiń aiqyn kórinisi dep baǵalady. Sondai-aq Prezidentke, Úkimetke, óńir ákimderine jáne jobaǵa qoldaý bildirip jatqan ulttyq kompaniialar men biznes qurylymdarǵa alǵysyn jetkizdi.
Onyń aitýynsha, negizgi mindet – barlyq nysandardy sapaly ári belgilengen merzimde aiaqtap, halyq igiligine berý. Osy maqsatta árbir qurylys jobasy turaqty baqylaýda bolady.
«Semeidi damytý – bir óńirdiń ǵana emes, tutas eldiń ortaq mindeti. «Abaiǵa qurmet» aktsiiasy osy joldaǵy yntymaq pen birliktiń naqty kórinisi», – dedi Berik Ýáli.
