Ár qazaq «Abai sózinen taǵylym aldym ba?» dep oilanýy kerek. Bundai pikirdi Parlament Májilisiniń depýtaty Saýytbek Abdrahmanov aitty, dep habarlaidy QazAqparat tilshisi.
«Abai Qunanbaiulynyń 175 jyldyq mereitoiyn ótkizý jónindegi memlekettik komissiianyń alǵashqy otyrysy ótti. Bul jiyn barysynda aldaǵy mereitoidyń jai-japsary, atqarylatyn istiń aýqymy aiqyndaldy. Atqarylatyn sharalardyń syrtynda, eń úlken jumys bizdiń ózimizdiń ishimizde, júregimizde jasalýy kerek dep sanaimyn. Ár qazaq «Abai atamyzdyń aitqanyn tyńdadym ba? Kemeńgerdiń sózinen taǵylym aldym ba? Qazir qandaimyz, Abai kútken halyqpyz ba? Abaidyń amanatyn aqtadyq pa?» degen turǵyda oilanyp, tolǵansa, eń úlken olja sol balady. Bizdiń halqymyz Abai óleńderin tek jattaýmen tynbai, ishki túleýge kóp kóńil bólse deimiz», - dep toqtaldy Saýytbek Abdrahmanov.
Sonymen qatar, depýtat Uly Abaidyń 175 jyldyǵyna orai aqyn óleńderin oqý estafetasyna qatysty óz oiyn aitty.
«Halyqtyń osy máselede erekshe silkiniste turǵandyǵy #Abai175 chellendjinen jaqsy kórinip otyr. Prezident Qasym-Jomart Toqaevtan bastap halyqtyń belgili tulǵalary, qarapaiym azamattar Abai óleńderin jattap, bir-birine jalǵastyryp jatqany bir ǵanibet», - dedi S.Abdrahmanov.
Aita keteiik, búgin QR Premer-Ministriniń orynbasary Gúlshara Ábdiqalyqovanyń tóraǵalyǵymen 2020 jyly qazaq halqynyń uly aqyny, aǵartýshysy Abai Qunanbaiulynyń týǵanyna 175 jyldyq mereitoiyn ótkizý jónindegi memlekettik komissiianyń alǵashqy otyrysy ótti.
Jiyn barysynda halyqaralyq, respýblikalyq jáne óńirlik deńgeidegi 500-ge jýyq túrli shara qamtylǵan Abai Qunanbaiulynyń 175 jyldyq mereitoiyna daiyndalý men ótkizý jónindegi jalpyrespýblikalyq jospardyń jobasy qaraldy.
