QR Mádeniet jáne sport ministri Aqtoty Raiymqulova Abai Qunanbaiulynyń óleńinen úzindi oqydy, dep habarlaidy "Ult aqparat".
Uly aqynnyń 175 jyldyǵyna orai uiymdastyrylǵan estafetany ministrge QR Prezidenti Qasym-Jomart Toqaev joldaǵan bolatyn.
«Elimizde Shyǵys pen Batystyń mádenietin, órkenietin jetik bilgen dara tulǵa Abaidyń 175 jyldyǵy qarsańynda uly aqynnyń óleńderin jatqa oqý estafetasy bastalǵanyn bilesizder. Kúni keshe sol tizgindi memleketimizdiń basshysy Qasym-Jomart Kemeluly Toqaevtan qabyl aldym. Bar qazaqtyń ǵana emes, adamzattyń alyp aqyny - uly Abai jyrlaryn jatqa oqý estafetasyn men Jazýshylar odaǵynyń tóraǵasy Ulyqbek Esdáýletke jáne Qazaqstannyń Eńbek Eri, olimpiiada chempiony Jaqsylyq Úshkempirovke sonymen qatar elimizdiń mádeniet, óner, sport qairatkerine jáne maitalman jastarǵa joldaimyn», - dedi ministr óziniń facebook paraqshasynda.
Aita ketsek, áleýmettik jelilerde qazaqtyń uly aqyny Abaidyń óleńderin oqý naýqany bastaldy. Bul challenge-di jeli qoldanýshylary taratyp jatyr. Challenge #abai175 heshtegimen belgilengen. Qazirgi ýaqytta jariialanymdar sany kún saiyn artýda. Buǵan deiin Bilim jáne ǵylym ministri Prezident joldaǵan estafetany qabyl aldy.
Sondai-aq, QR Prezidenti mamyr aiynda Abaidyń 175 jyldyq mereitoiy týraly Jarlyqqa qol qoiǵan bolatyn.
