Abai oblysynda quny 67 mln AQSh dollaryn quraityn iri indýstriialyq-ekologiialyq aǵash óńdeý parki boi kóteredi. Joba órtten zardap shekken jáne sanitarlyq kesýge jatatyn aǵashtardy tiimdi óńdeýge, qaldyqsyz óndiris qalyptastyrýǵa jáne óńirdiń ónerkásiptik áleýetin arttyrýǵa baǵyttalǵan, dep habarlaidy ult.kz oblys ákimdigine silteme jasap.
Joba aiasynda Semei qalasynda 50 gektar aýmaqta tolyq tsikldi aǵash óńdeý parki, al Borodýliha aýdanyndaǵy Mihailovka aýylynda 4 gektar jerge aǵashty bastapqy óńdeý kesheni salynady.
Semeidegi óndiris jylyna 2 mln tekshe metrge deiin aǵash shikizatyn óńdep, 800–900 myń tekshe metr daiyn ónim shyǵarýǵa qaýqarly bolady. Keshen quramynda MDF, OSB jáne FOSB taqtalaryn shyǵaratyn zaýyttar, jihaz óndirisi, aǵash pelletteri men biootyn, organikalyq tyńaitqysh óndiretin kásiporyndar, sondai-aq qurylys-logistikalyq ortalyq jumys isteidi.
Al Borodýliha aýdanyndaǵy keshende jylyna 500 myń tekshe metrge deiin aǵash óńdelip, 120–150 myń tonna aǵash pelleti óndiriledi. Munda aǵashty qabyldaý, suryptaý, aralaý, keptirý jáne tereń óńdeýge daiyndaý jumystary júrgizilip, keiin shikizat Semeidegi negizgi óndiris alańyna jóneltiledi.
Joba tolyq iske qosylǵanda 900-ge deiin turaqty jumys orny ashylady. Óndirilgen ónim ishki naryqpen qatar Ortalyq Aziia, Eýropa, Japoniia, Ońtústik Koreia jáne basqa da halyqaralyq naryqtarǵa eksporttalmaq.
Kásiporyndy 2028 jyly paidalanýǵa berý josparlanyp otyr. Joba óńirde aǵash óńdeý salasyn damytýǵa, tabiǵi resýrstardy tiimdi paidalanýǵa jáne joǵary qosylǵan quny bar eksportqa baǵdarlanǵan ónim óndirisin jolǵa qoiýǵa múmkindik beredi.
Sonymen qatar, biyl Abai oblysynda jalpy quny 131,2 mlrd teńgeni quraityn 41 investitsiialyq jobany iske asyrý kózdelgen. Nátijesinde 3263 jańa jumys orny ashylady. Jyl basynan beri óńirde 34,62 mlrd teńgelik 14 joba paidalanýǵa berilip, 598 adam turaqty jumyspen qamtylǵan.
