Meshitterde sadaqa salýǵa arnalǵan elektrondy terminaldyń ornatylýy – Qazaqstan musylmandary dini basqarmasynyń ashyqtyqty qoldaitynyn dáleldeidi.
«Ashyq dialog» baǵdarlamasynda QR Aqparat jáne qoǵamdyq damý ministri Dáýren Abaev osylai dedi, dep habarlaidy "Ult aqparat".
«Bul - óte mańyzdy jumys. Bul bastamanyń ózin Qazaqstan musylmandary dini basqarmasynyń bastap otyrǵany erekshe qýantady. Bul degenińiz – dini basqarmamyzdyń ashyqtyqty, esep berýdi qoldap otyrǵanyn dáleldeidi. Sol sebepti, terminaldardy ornatyp, halyqqa túsindirý jumystaryn júrgizý – búkil el boiynsha qolǵa alynady», - dedi Dáýren Abaev.
Ministr bul baǵyttaǵy kelesi qadam – mobildi qurylǵy, bank kartalary arqyly qurban shalý bastamasy bolatynyn atap ótti.
«Ol ne beredi? Ol eń aldymen azamattarǵa aýdarǵan qarajattyń muqtaj adamdarǵa anyq taratylatynyna kózderin jetkizip, senim uialatady. Ol qarajat meshit jumysyn qoldaýǵa, jastardy medreselerde oqytýǵa, kóptegen igi iske jumsalady. Qurban shalý – senimge kelip tireledi. Shalǵan qurbany tiisti jerine baratynyna kúmán keltiretin azamattar bar. Qazir ondai kúdikshil adamdardyń sany azaiary anyq», - dedi ol.
Eske sala ketsek, kúni keshe elordadaǵy «Áljan ana» meshitinde sadaqa salýǵa arnalǵan elektrondy terminal iske qosylǵan bolatyn.
