Búgin QR Mádeniet jáne sport ministri Dáýren Abaev Almaty qalasynda Qytai eliniń astanasy Beijińde ótetin HIII qysqy paralimpiadanyń aldynda ulttyq paralimpiada quramasynyń oqý-jattyǵý qorytyndy jiyny ótip jatqan «Alataý» qysqy sport túrlerine arnalǵan respýblikalyq joǵary sporttyq sheberlik mektebinde boldy. Bul týraly ministrliktiń resmi saitynda habarlandy.
Ministr qatań antikovid shekteýleri jaǵdaiynda ótip jatqan emdeý-jattyǵýlarǵa bailanysty sportshylarmen onlain-bailanys rejiminde sóilesti.
«Sizderdiń sporttyq jetistikterińiz, jeńiske degen erik-jigerlerińiz - sporttyń biik shyńy. Sizder - bizdiń maqtanyshymyzsyzdar. Búkil el sizderge jankúier bolady. Aldaǵy jarysta sáttilik serik bolsyn!», - dep atap ótti Dáýren Abaev.
Ulttyq qurama atynan Vasilii Kolomiets sóz sóiledi.
Eske salaiyq, Beijiń-2022 XIII Qysqy Paralimpiada 2022 jyldyń 4-13 naýryzy aralyǵynda ótedi. Dúbirli dodaǵa 50 elden 700-den astam sportshy qatysady. Ulttyq paralimpiada quramasy sapynda Erbol Hamitov, Aleksandr Gerlits, Sergei Ýsoltsev, Iýrii Berezin jáne Denis Petrenko syndy 5 sportshy bar.
Paralimpiadashylarymyz sporttyń eki túrinen – para shańǵy jarysy men para biatlon boiynsha synǵa túsedi.
Paralipiadanyń ashylý saltanaty 2022 jyldyń 4 naýryzynda Nur-Sultan ýaqyty boiynsha saǵat 22.00-de bastalady. Qazaqstan Paralimpiada quramasynyń tý ustaýshysy - para shańǵy jarysynan Álem kýbogynyń qola júldegeri, halyqaralyq dárejedegi sport sheberi Erbol Hamitov.
