Osy aptada baspasóz bostandyǵynyń jyl saiynǵy reitingi jariialandy. Reiting boiynsha elimiz 157-orynda bolsa, Ózbekstan Qazaqstannan bir saty joǵary tur. Bul týraly QR Aqparat jáne qoǵamdyq damý ministri Dáýren Abaev «Ashyq dialog» baǵdarlamasynda aitty, dep habarlaidy "Ult aqparat".
«Bul taqyrypty ótken jyly da qozǵaǵan edik. Men jaǵdaiy bizden tómen elderdiń reitingte qalai ozyp ketetini týraly mysal keltirgenmin. Meni durys túsinińizder, men bul jerde bizde bári minsiz ekenin, reitingtiń basynda bolýymyz kerek ekenin dáleldemek emespin. Reiting boiynsha turǵan ornymyz - qazirgi shynaiy ómirimizdiń kórinisi emes. Qazaqstanda jumys isteitin kóptegen sheteldik qor, úkimettik emes uiymdar osyny moiyndaidy», - deidi QR Aqparat jáne qoǵamdyq damý ministri Dáýren Abaev.
Ol bizdiń elde onshaqty sheteldik tilshi tirkelgenin aitty.
«Sheteldik tilshilerge reitingtiń basynda turǵan memleketterge qaraǵanda, bizdiń elde kásibi mashyǵyn jetildirý áldeqaida qolaily ekenine senimdimin. Ózbekstandyq áriptesterge keler bolsaq, ol jaqtaǵy basshylyq úlken reformalar jasap jatyr. Ádildik bolýy úshin aitaiyn: olar engizgen nárse men halyqaralyq uiymdar belgilegen nárseler bizdiń elde buryn jasalyp qoiǵan. Mysaly, Ózbekstanda BAQ-ty tirkeý jeńildetilgen. Bizdiń memlekette BAQ-ty tirkeý jeńildetilip qana qoiǵan joq, ol onlain formatta júzege asyrylady. Munyń bári bizde 2012 jyldan beri iske asyp keledi. Qazaqstannyń kez kelgen azamaty muny istei alady», - deidi ol.
Onyń aitýynsha, elimizde BAQ-ty tirkeýde ruqsat etilmeitin jalǵyz jaǵdai – osy ýaqytqa deiin bar BAQ-ty qaitalaý.
«Kóp reportaj tikelei efirde shyǵatyny aitylady. Biz úshin tikelei efirde reportaj jasaý – qalypty jaǵdai. Men telekórermen úshin bir qupiiany aitaiyn: Qazaqstandaǵy barlyq telearnada jańalyqtar tikelei efirde shyǵady. Mysaly, onda jemqorlyq máselesin kóterdi. Bizde korrýptsiiaǵa qarsy agenttik - elimizdegi eń negizgi jańalyq taratýshylardyń biri. Ózbekstandaǵy áriptesterdiń eńbegine eshqandai kúmán keltirmeimin, biraq bul reitingtiń sýbektivtiligi qatty kórinip tur», - deidi ministr.
