Aqparat jáne qoǵamdyq damý ministri Dáýren Abaev jýrnalisterge bergen suqbatynda birer kún buryn internet buǵattalǵanyna ózi basqaratyn ministrliktiń qatysy bolmaǵanyn aitty.
Onyń sózinshe, "internettiń ne úshin buǵattalǵanyn sol salaǵa quzyreti bar organnan suraý kerek. Al, aqparat jáne qoǵamdyq ministrliginiń bailanys salasyndaǵy quzyry osydan bir jyl buryn alynyp qalǵan".
Alaida, ministr internetti buǵattaý jáne qaita qosýmen qai ministrlik nemese qandai memlekettik organ ainalysatynyn ashyp aitpady.
Bailanys salasy buryn aqparat jáne qoǵamdyq damý ministrligine qarasty bolǵan kezde de internet jii ajyraityny baiqalǵan jáne ol kezde Abaev tehnikalyq aqaýlar sebep boldy degen bolatyn. Azattyq tilshisiniń bul týraly saýalyna:
- Iá, ol kezde tehnikalyq problemalar boldy, bul joly neden ekenin bilmeimin, - dep jaýap berdi.
Keshe, aqpannyń 16-syna Qazaqstan Prezidentiniń baspasóz hatshysy Berik Ýáli "Prezident Qasym-Jomart Toqaev Miýnhende (Germaniia) jumys saparymen júrgende Qazaqstannyń internet jelisindegi aqaý jaiynda habardar boldy. Memleket basshysy barlyq aqparattyq resýrstardyń jumysyn qalpyna keltirýdi tapsyrdy" dep jazdy.
Aqpannyń 14-15-ine Qazaqstanda Google, Telegram, Youtube, Instagram siiaqty keibir jelilerdiń jumysy tejelip, sheteldik saittardyń ashylýy qiyndaǵany baiqalǵan bolatyn.
