Qazaqstan aqparat jáne qoǵamdyq damý ministri Dáýren Abaev 25 sáýirde memlekettik "Habar" arnasyna bergen suhbatynda Almatyda "Shyndyqtan qutyla almaisyń" degen banner ustap, 15 kúnge qamalǵan eki belsendi týraly aitty, dep jazady Azattyq.
Apta saiyn Abaev qonaq retinde qatysatyn "Ashyq áńgime" habarynyń júrgizýshi ministrden "Belsendilerge kesilgen jaza olar jasaǵan quqyq buzýshylyqqa laiyq pa?" dep suraidy.
Abaev "is materialdarymen tanyspaǵandyqtan laýazymdy tulǵa, memleket qyzmetshisi retinde sot sheshimi jaily eshteńe dei almaimyn" deidi.
"Biraq saiasi aktsiianyń mazmunyna qatysty azamattyq pikirimdi bildireiin. Kim ne dese de, bul - saiasi aktsiia. Barlyq sipaty soǵan kelip tur. [...] Ádil sailaýǵa shaqyrý Qazaqstan zańnamasynyń eshbirine qaishy emes. Azamattyq bastama retinde men jastardyń bul áreketin qoldaimyn. Biraq mundai aktsiialar, [Qazaqstannyń ishki ister] ministri Turǵymbaev aitqandai, zań aiasynda ótýi tiis" deidi Abaev.
21 sáýirde Almaty marafony kezinde politsiia birneshe belsendini jol jiegine "Ot pravdy ne ýbejish. Ý menia est vybor. #adilsailayuzhin" (Shyndyqtan qutyla almaisyń. Meniń tańdaýym bar. Ádil sailaý úshin) degen jazýy bar banner ilgeni úshin ustaǵan. Sol kúni sot 34 jastaǵy Ásiia Tólesova men 20 jastaǵy Beibarys Tolymbekovti "beibit jiyn ótkizý tártibin buzdy" dep aiyptap, 15 kúnge qamady.
Sot banner ustaǵandarǵa qatysy bar jáne "beibit jiyn ótkizý tártibin buzdy" degen aiyppen taǵy úsh belsendige aiyppul saldy.
Bul oqiǵaǵa halyqaralyq uiymdar da reaktsiia bildirdi. 25 sáýirde Freedom House quqyq qorǵaý uiymy Qazaqstan biligin Almatyda ustalǵan belsendilerdi bosatýǵa shaqyrdy. Amnesty International halyqaralyq uiymy Ásiia Tólesova men Beibarys Tolymbekovti "ar-ojdan tutqyny" dep tanydy.
