Ombydaǵy XVI Óńirlik yntymaqtastyq forýmynda Aqparat jáne qoǵamdyq damý ministri Dáýren Abaev jastarmen jumys qalai júrgizilip jatqanyn aityp berdi, dep habarlaidy QazAqparat.
Ministr Qazaqstan ózindik júieli sharalardy qolǵa alyp jatqanyn tilge tiek etti.
«Biz ekonomikany tsifrlandyrýdy qolǵa aldyq. Bul protseske jastardy keńinen tartyp jatyrmyz. Qazaq halqynyń dástúrli qundylyqtaryn qazirgi zamannyń kózqarasymen úilestirý úshin «Rýhani jańǵyrý» baǵdarlamasy júzege asyrylýda. Úshinshisi - Qazaqstan Prezidenti halyqqa qulaq asatyn memlekettiń tujyrymdamasyn jariialady. Onyń negizinde bilik pen adamnyń ádilet, ashyqtyq jáne senim qaǵidattary aiasyndaǵy ózara is-qimyly jatyr», - dedi Dáýren Abaev.
Ministr Qazaqstanda júzege asyrylyp jatqan «Prezidenttik kadr rezervi» jobasy memlekettik júieniń basqarýshylyq quramyn jas, shyǵarmashyl jáne ór jastardyń esebinen jańartýǵa baǵyttalǵanyn atap ótti. Onyń aitýynsha, 2020 jyl - Qazaqstanda volonterler jyly dep jariialanǵan.
«Búgin Uly Otan soǵysyndaǵy jeńistiń 75 jyldyǵy qarsańynda qazaqstandyq-reseilik volonterlik jobalardy júzege asyrý týraly kelisimge qol qoiyldy. Bul - urpaǵynyń beibit ómiri úshin janyn bergen jandardyń urpaǵy - bizder úshin asa mańyzdy baǵyt. Sonymen birge biz birlesken jobalardyń taqyryptaryn keńeitýdi usynamyz», - dedi D.Abaev.
Ol volonterlik jastardyń jumysqa ornalasýynyń bir túri ekenin, onyń ózektiligi arta túsetinin jetkizdi.
«Memleket jumystan tys ýaqytta azamatty smartfonmen ǵana ońasha qaldyrmaýy kerek. Bul únemi narazylyqty, áńgimelesýshini tyńdai almai, daý úshin pikirtalasqa beiim bolýdy, basqa adamdardyń quzyreti men nátijelerin baǵalamaýdy ómir saltyna ainaldyrýy múmkin. Ókinishke qarai, popýlistik urandar men demagogtar túrindegi jelilik mazmun dál osyǵan negizdelgen. Osyǵan bailanysty biz Prezidenttiń atynan azamattyq qoǵamdy damytý salasynda tereń reformalar júrgizýge niettimiz jáne reseilik áriptesterimizben birge jumys isteýge daiynbyz», - dep túiindedi D. Abaev.
