QR Aqparat jáne qoǵamdyq damý ministri Dáýren Abaev Astana Media Week aptalyǵyn ashty, dep habarlaidy "Ult aqparat".
Ministr Ortalyq Aziiada balamasy joq bul basqosýdyń siz ben bizge, otandyq media salasyn damytýǵa qosatyn úlesi joǵary bolatynyna senim bildirdi.
«Memlekettik múddeni halyqqa jetkizip, qoǵamdaǵy ózgeristerge sai kózqaras qalyptastyrýda media salasynyń atqarar mańyzy zor. Osy oraida, elimizdiń aqparattyq quraldary aldynda úlken maqsat-mindetter tur. Ol Elbasy bastaǵan, Memleket basshysy qoldap otyrǵan saiasi-ekonomikalyq jáne Rýhani jańǵyrý jónindegi keshendi reformalarǵa jurtshylyqty jumyldyrý. Astana Media Week dialog alańyndaǵy negizgi maqsattardyń biri - sizder bir-birlerińizdi tanyp, pikir almasady degen niet. Osylaisha, elimizdiń media salasyn ár taraptan emes, ortaq múdde aiasynda damytý degen tilek bar. Bul aýqymdy sharanyń kózdegen taǵy bir maqsaty - el turǵyndarynyń mediasaýattylyǵyn arttyrý, mediamádenietti qalyptastyrý. Aqparat jáne qoǵamdyq damý ministrligi mass-medianyń sapasyn arttyratyn kez kelgen bastamany qoldaýǵa árqashan daiyn. Sizderdi paneldik sessiialarǵa belsene qatysýǵa shaqyryp, búgingi jáne aldaǵy jiyndarǵa tabys tileimin.
Onyń aitýynsha, media salasyndaǵy ózekti máseleler jyldan-jylǵa kóbeiip keledi. Onyń basty sebebi - aqparatty óndirý men tutyný protsesiniń túbegeili ózgerýi.
«Uialy telefonnyń teledidarmen jáne basylymdarmen básekege túskeni barshamyzǵa belgili. Bul protseste tehnologiialyq nemese marketingtik qana emes, etikalyq, demografiialyq jáne áleýmettik-saiasi erekshelikteri de bar. Moiyndaý kerek, memleket úlken jáne ikemsiz biýrokratiialyq mehanizm retinde bul ózgeristerge biz oilaǵandai jedel jaýap bere almai otyr. Sondyqtan, biz úshin, memlekettik organdar úshin qazirgi ózgeristerge jaýap berý úshin sizderdiń, kásibi mamandardyń pikiri men kózqarasy óte mańyzdy», - dedi Dáýren Abaev.
Aita keteiik, elordadaǵy «Qazmedia» ortalyǵynda úsh kúnge sozylatyn Ortalyq Aziiadaǵy eń iri media-oqiǵa — Astana Media Week bastaldy.
Astana Media Week-tiń birinshi kúni serialdyq ónimderdi ázirleý jáne shyǵarý taqyrybymen jáne salyq preferentsiialary, kino prokatynyń sharttary, mazmuny, film óniminiń shyǵarmashylyq deńgeii jáne onyń demeýshiler úshin tartymdylyǵy taqyrybymen erekshelenedi.
