QR Aqparat jáne kommýnikatsiialar ministri Dáýren Abaev azamattardyń tabysyn arttyryp, ómir sapasyn jaqsartý boiynsha qurylǵan jumys tobynan úmit kútetinin málim etti, dep habarlaidy QazAqparat tilshisi.
Aita ketsek, «Habar» arnasyndaǵy «Ashyq dialog» baǵdarynda júrgizýshi Dáýren Abaevtan elordadaǵy bes balanyń ólimine qatysty suraq qoiǵan edi.
«Shynynda da, óte qaiǵyly jaǵdai boldy. Prezident qaitys bolǵan balalardyń ata-anasy men týystaryna kóńil aita otyryp, mundai jaǵdaidyń eshqashan qaitalanbaýy úshin tiisti tapsyrma berdi. Qazaqta «Atam-ai dep jylatsań da, botam-ai dep jylatpa» degen sóz bar. Ózińiz biletindei, kúni keshe ǵana elimizdegi azamattardyń tabysyn arttyryp, ómir sapasyn jaqsartý baǵytynda jumys toby qurylǵan bolatyn. Sonymen birge, kópbalaly otbasylardy qoldaý sharalaryn kúsheitý týraly mindet júktelgen edi. Ol jumys tobyn vitse-premer Erbolat Asqarbekuly Dosaev basqardy», - dedi Dáýren Abaev.
Ministrdiń aitýyna qaraǵanda, jumys tobynyń qyzmetin Memleket basshysynyń ózi jiti baqylaýyna almaq.
«Jumys toby usynǵan sharalar analarǵa kórsetiletin áleýmettik qoldaý tetikteriniń tiimdiligin arttyraryna senimdimin», - dep túidi Dáýren Abaev.
Eske sala ketsek, Aqparat jáne kommýnikatsiialar ministri Dáýren Abaev buǵan deiin Eńbek jáne halyqty áleýmettik qorǵaý ministri Mádina Ábilqasymovanyń otstavkaǵa ketýi jónindegi áleýmettik jelidegi talapqa qatysty pikirin bildirgen bolatyn.
«Alaida, meniń oiymsha, balalardyń ólimine ministr Ábilqasymovaǵa ǵana bar kináni artý ádiletsiz bolar edi. Kelisemin, eshkim de jaýapkershilikten jaltarmaýy kerek. Ainalyp kelgende, biz - búkil memlekettik apparat - elimizde bolyp jatqan barlyq jailarǵa jaýaptymyz.
Bir nárseni túsinýimiz kerek, osy qaiǵyly oqiǵaǵa bir ǵana emes, birneshe faktor sebep boldy jáne barlyq máseleni Eńbek jáne halyqty áleýmettik qorǵaý ministrliginiń jumysy sheshe alady deýge kelmeidi. Mádina Erasylqyzynyń ózi de, áiel retinde, úsh balanyń anasy retinde bul jaǵdaidy aýyr qabyldady. Sol sebepti, tek konstrýktivti syn qalyp, arandatý toqtaidy degen úmittemin. Onyń ústine men ministr Ábilqasymovany óz isine adal kásibi maman retinde bilemin», - degen edi Dáýren Abaev.
