QR Eńbek jáne halyqty áleýmettik qorǵaý ministri Serik Shápkenov halyqqa esep berý kezdesýinde ataýly áleýmettik kómek berýdegi zamanaýi tsifrlyq sheshimder týraly aityp berdi, dep habarlaidy QazAqparat.
Ministr 2020 jyly Qazaqstanda ashyqtyqty, ádildikti jáne ózara jaýapkershilikti kúsheitý qaǵidattaryna negizdelgen ataýly áleýmettik kómek (AÁK) kórsetýdiń jańa modeli iske asyrylǵanyn atap ótti.
«Ataýly áleýmettik kómek sheńberinde 4 jáne odan da kóp balalary bar otbasylarǵa beriletin járdemaqy engizildi jáne tabysy az otbasylardyń balalary úshin kepildik berilgen áleýmettik toptama engizildi. Toptamanyń quramyn qalyptastyrýda densaýlyq saqtaý, bilim berý mamandarynyń usynymdary, jurtshylyqtyń pikiri eskerildi. 2020 jyly 435 myń bala osyndai áleýmettik toptama aldy», - dedi ministr.
Eńbek ministrligi derekterine sáikes, byltyr barlyǵy 936 myńnan astam adam nemese tabysy az 185 myń otbasy áleýmettik kómek aldy. Onyń ishinde 600 myń bala (64%), 73,5 myń kópbalaly otbasy bar.
Jumyspen qamtýǵa járdemdesýdiń belsendi sharalaryna 201 myń adam nemese eńbekke qabiletti AÁK alýshylardyń 74%-y tartyldy, 1,4 myń otbasy óz isin damytý úshin jeńildetilgen mikrokredit aldy.
«AÁK-ti odan ári jetildirý maqsatynda jáne alýshylarǵa yńǵaily bolý úshin biz zamanaýi tsifrlyq sheshimderdi engizýdi jalǵastyramyz. Máselen, 2021 jyldan bastap AÁK-ke ótinishti Elektrondyq úkimet portaly arqyly berýge bolady. Balalarǵa arnalǵan áleýmettik toptama Áleýmettik qyzmetter portalyna aýystyrylady. Jańa «Eńbek» ulttyq jobasy aiasynda eńbekke qabiletti áleýmettik kómek alýshylardyń tabysyn arttyrý úshin jumysqa ornalastyrý, suranysqa ie mamandyqtarǵa oqytý, óz isin ashý nemese damytý úshin jeńildikti mikrokreditter men granttar berý boiynsha keshendi sharalar usynylatyn bolady», – dep túiindedi S. Shápkenov.
