Qazaqstan Respýblikasy Eńbek jáne halyqty áleýmettik qorǵaý birinshi vitse-ministri Erjan Jylqybaev jáne QR Eńbekmini Eńbek, áleýmettik qorǵaý jáne kóshi-qon komitetiniń tóraǵasy Erbol Nurǵaliev Shymkent qalasy jáne Túrkistan oblysyna jumys sapary barysynda halyqty jumyspen qamtý ortalyqtarynyń qyzmetkerlerine jáne aýdan turǵyndaryna ataýly áleýmettik kómek berýdiń jańa erejelerin túsindirdi, dep habarlaidy "Ult aqparat" ministrliktiń baspasóz qyzmetine silteme jasap.
Birinshi vitse-ministr Sairam aýdanynyń halyqty jumyspen qamtý ortalyǵyna bardy. Jylqybaev ortalyq qyzmetkerlerine AÁK jańa formatta taǵaiyndaý máselelerin azamattarmen aldyn ala pysyqtaýdy usyndy.
«Ózderińiz bilesizder, 2020 jyldyń 1 qańtarynan bastap ataýly áleýmettik kómek toqsan saiyn taǵaiyndalady. Endi sizderdiń negizgi 2 mindetińiz bar: jeltoqsan aiyna tólemderdi kelesi jylǵa aýystyrmai jyl sońyna deiin tóleý jáne azamattarǵa qańtar aiynda AÁK taǵaiyndaý úshin qujat tapsyrýǵa bolatynyn jáne aqpanda áleýmettik kómek alatynyn túsindirý. Olar jańa jyldyq merekelerden keiin alańdap, jumyspen qamtý ortalyqtarynda kezek qurýdyń qajeti joq», - dedi ol.
Sonymen qatar, Sairam aýdanynda Erjan Jylqybaev nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasyn iske asyrý aiasynda AÁK, grant pen mikrokredit alǵannan keiin óz isin ashqan aýyl turǵyndarymen kezdesti.
«Osy adamdardyń bireýi shaǵyn biznesti úide ashty, bireý mektepke deiingi bilim berý kýrsyn uiymdastyrdy. Bul - memlekettiń qoldaýyn paidalana otyryp, otbasynyń materialdyq jaǵdaiyn jaqsartýǵa ǵana emes, sonymen qatar jaqsy tabys tabýǵa da múmkindik beretin mysaldar. Men jumyssyz adamdardy kásipkerlikti damytý úshin jaqsy tetikter kózdelgen «Eńbek» memlekettik baǵdarlamasyna belsendi qatysýǵa shaqyrǵym keledi. Sonymen qatar, kópbalaly analardy kishi jáne shaǵyn bizneske tartý úshin kelesi jyldan bastap kredit berý merzimi artyp, kredit boiynsha paiyzdyq mólsherleme azaiady», – dedi Erjan Jylqybaev isin jańa bastaǵan kásipkerlermen kezdesý sońynda.
Búgin birinshi vitse-ministr Shymkent qalasynyń turǵyndarymen kezdesý ótkizip, 2020 jylǵy 1 qańtardan bastap engiziletin ataýly áleýmettik kómek kórsetýdiń jańa tetikterin egjei-tegjeili túsindirdi.
Qala turǵyndarynyń aldynda sóz sóilegen Erjan Jalqybaev 12 jeltoqsanda QR Parlamentiniń Senaty «Qazaqstan Respýblikasynyń keibir zańnamalyq aktilerine mindetti áleýmettik saqtandyrý, áleýmettik qamsyzdandyrý jáne densaýlyq saqtaý salasyndaǵy memlekettik-jeke menshik áriptestik máseleleri boiynsha ózgerister men tolyqtyrýlar engizý týraly» Zańdy qabyldaǵanyn eske saldy.
«Zań kópbalaly otbasylarǵa jańa memlekettik járdemaqy engizýdi, AÁK kórsetý tetikterin jetildirýdi jáne tabysy az otbasynan shyqqan balalarǵa kepildik berilgen áleýmettik toptama engizýdi kózdeidi», – dedi Erjan Jylqybaev.
Sonymen, 2020 jylǵy 1 qańtardan bastap 4 jáne odan da kóp kámeletke tolmaǵan balalary bar nemese 23 jasqa deiingi kúndizgi oqý bóliminde oqityn stýdentteri bar otbasylarǵa otbasynyń tabysyna qaramastan saralanǵan mólsherde: 4 balaǵa – 42 496 teńge; 5 balaǵa – 53 127 teńge; 6 balaǵa – 63 757 teńge; 7 jáne odan da kóp balaǵa – 74 388 teńge memlekettik járdemaqy tólenedi.
AÁK usynýdyń jańa tásilderi mynalardy kózdeidi: ár toqsan saiyn ataýly áleýmettik kómek taǵaiyndaý; AÁK taǵaiyndaýdyń qazirgi shekti kriteriiin saqtaý - otbasynyń jan basyna shaqqandaǵy ortasha tabys kúnkóris deńgeiiniń 70%-ynan kem bolýy kerek; otbasynyń barlyq músheleri úshin AÁK mólsherin jan basyna shaqqandaǵy kirister men kedeilik sheginiń arasyndaǵy aiyrmashylyq retinde anyqtaý; eńbekke qabiletti azamattarǵa qoiylatyn talaptardy kúsheitý, eger olar jumysqa ornalasýdan bas tartqan jaǵdaida, AÁK tóleý barlyq otbasy úshin toqtatylady; ýchaskelik komissiialardyń osy protsestegi róliniń kúsheiýimen otbasynyń materialdyq jaǵdaiyna zertteý júrgizý merzimin 3 kúnnen 7 kúnge deiin ulǵaitý.
Kepildik berilgen áleýmettik toptamany usyný aiasynda 1 jastan 6 jasqa deiingi tabysy az otbasylardyń balalary azyq-túlik jiyntyǵymen jáne gigienalyq zattarymen qamtamasyz etiledi, 6 jastan 18 jasqa deiin olar mektepterde ystyq tamaqpen, oqý quraldary men mektep kiimderimen qamtamasyz etiledi, sondai-aq, mektepke deiingi jol júrý shyǵyndary óteledi. 18 jasqa deiingi balalarǵa meditsinalyq kómek, onyń ishinde stomatologiialyq kómek aqysyz meditsinalyq kómektiń jáne mindetti áleýmettik meditsinalyq saqtandyrýdyń kepildendirilgen kólemi aiasynda kórsetiledi.
Sóz sońynda Jylqybaev zańǵa sáikes, aǵymdaǵy jyly taǵaiyndalǵan AÁK jarty jylǵa taǵaiyndalǵany nemese bir jylǵa taǵaiyndalǵany mańyzdy emes, 31 jeltoqsanǵa deiin áreket etetinin atap ótti.
Jumys sapary barysynda birinshi vitse-ministr sondai-aq HQKO-ǵa, HJQO-ǵa jáne Shymkent qalasynyń halyqty jumyspen qamtýdyń mobildi ortalyǵyna barady, onda qyzmetkerlermen qajetti túsindirý jumystaryn júrgizedi, sondai-aq AÁK alǵannan keiin biznes ashqan qala turǵyndarymen kezdesedi.
Osyndai túsindirý jumystaryn 26-27 jeltoqsanda Túrkistan oblysynda QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń tóraǵasy Erbol Nurǵaliev júrgizedi.
Esterińizge sala keteiik, 24-25 jeltoqsan aralyǵynda QR Eńbek jáne halyqty áleýmettik qorǵaý vitse-ministri Nariman Mukyshev Qaraǵandy oblysynda AÁK-tiń jańa tetikterin engizý boiynsha halyqqa jáne Halyqty jumyspen qamtý ortalyǵynyń qyzmetkerlerine túsindirý jumysyn júrgizdi.
Buryn habarlanǵandai, QR Premer-Ministriniń orynbasary Berdibek Saparbaevtyń óńirlerge jumys sapary barysynda QR Eńbek jáne halyqty áleýmettik qorǵaý ministri Birjan Nurymbetov Shyǵys Qazaqstan, Qaraǵandy, Qyzylorda, Atyraý, Batys Qazaqstan, Túrkistan, Aqtóbe, Pavlodar, Aqmola, Almaty, Soltústik Qazaqstan, Qostanai jáne Mańǵystaý oblystarynyń, sonymen qatar Almaty, Shymkent qalalarynyń turǵyndaryna AÁK taǵaiyndaýdyń jańa tetikteri boiynsha túsindirme jumystaryn júrgizdi.
