Búgin Qapshaǵai qalasynyń ákimi Talǵat Qainarbekov turǵyndar aldynda qorytyndy esepti jiynyn ótkizip, jiynǵa oblys ákimi Amandyq Batalov qatysty, dep habarlaidy "Ult aqparat"Almaty oblysy ákimdiginiń resmi saityna silteme jasap.
Qala ákimi T. Qainarbekov 60 myńnan astam turǵyny bar Qapshaǵaida ótken jyly atqarylǵan jumystar týraly esep berip, aldaǵy josparlary týraly baiandady. Onyń habarlaýynsha, ótken jyly óndirilgen ónerkásip óniminiń kólemi 50 mlrd. teńgege jýyqtap, 2015 jylmen salystyrǵanda 132,3 % quraǵan. Negizgi kapitalǵa tartylǵan investitsiia kólemi 22,8 mlrd. teńgege jetip, onyń ishinde biýdjetten tys investitsiia 51,2% boldy. Júzege asyrylǵan jobalardyń ishinde «ANNAR» jel elektr stantsiiasy, «Grin Lend Alataý» JShS men «LSTmarket» jylyjailaryn keńeitýdiń 2-shi kezeńderin atap ótýge bolady. Atalmysh jobalardy júzege asyrý barysynda 145 jańa jumys orny qurylǵan.
Qazirgi kezde ónerkásip óndirisi áleýetin arttyrý maqsatynda qalany birneshe sektorǵa bólip qarastyryp, damytý josparlanyp otyr. Olar: Qapshaǵai óńiri, Zarechnyi aýyldyq okrýgi jáne «Arna» indýstrialdy aimaǵy.
Sonymen qatar shaǵyn jáne orta biznesti, týrizmdi damytý qala ekonomikasyn quraityn negizgi salalardyń biri. Búgingi kúni qalada 3408 shaǵyn jáne orta biznes nysany bolsa, onda 16,3 myń adam jumys isteidi. Olar ótken jyly olar shyǵarǵan ónim men kórsetken qyzmet kóleminiń quny 12,2 mlrd. teńge boldy. Bul biýdjet túsiminiń 60 % qurap otyr.
Qapshaǵai sý qoimasy aýmaǵynda týrizm infraqurylymynyń 187 nysany ornalasqan. Ol jerlerde 9 qonaq úi, 8 oiyn ǵimarattary, 3 slod-klýb qyzmet kórsetedi. Aldaǵy ýaqytta týrizmdi damytý maqsatynda kól jaǵalaýlaryn damytý, sapaly qyzmet kórsetý, qoljetimdi demalys aimaqtaryn qalyptastyrý jumysy jandandyrylatyn bolady.
265 mln. teńgege eki jaǵajaidyń pilottyq jobasy daiyndalǵan. Ile ózeniniń jaǵalaýynda balyq aýlaý men demalysty uiymdastyrý maqsatynda «Eksim Kommers Grýpp» JShS bazasyn ashý josparlanǵan. Oǵan tartylatyn investitsiia somasy 20,0 mln.teńgeni qurap, 35 jumys orny ashylady dep kózdelip otyr.
T. Qainarbekovtiń esepti baiandamasynan keiin sóz alǵan oblys ákimi Amandyq Batalov Memleket basshysy tapsyrmalarynyń oblysta oryndalý barysy týraly aita kele:
- Qapshaǵai – geografiialyq ornalasýy jaǵynan, ekonomikalyq damý, týrizmdi órkendetý jaǵynan múmkindigi zor aimaq. Qala ákiminiń 2017 jylǵa jasaǵan josparlaryn ótken jyldyń sońynda aýdan, qala ákimderiniń tyńdaýyn ótkizgen kezde de birge talqylaǵanbyz. Baǵyty durys, josparlary anyq. Ónerkásip aimaqtaryn órkendetý, investorlar tartý, qalany kóriktendirý, kól jaǵalaýyn damytý, turǵyn úi jáne basqa da áleýmettik nysandar salý basqa da aiqyn josparlaryn qoldap, qajetti qoldaý kórsetemiz. Ónerkásip alańdarynda jańa kásiporyndar ashylady. Qapshaǵaidyń zaman talabyna sai Mádeniet úii boi kóteretin kún de alys emes. Saiabaqtaryńyz jańasha kelbetke enedi. Talǵat Qainarbekovtiń jumysyna sáttilik tileimiz. «Ákim bol, halqyńa jaqyn bol» degen sóz beker aitylmaǵan. Neǵurlym halyqpen etene aralassań, jaqyn bolsań, turǵyndar isińe árqashan kómekshi bolady, qajet jerinde keńes beredi, sondyqtan halyqpen túsiniste jumys isteý kerek, - dedi.
Munan soń jiynda qala turǵyndary tarapynan birneshe suraq qoiyldy. Atap aitqanda, qalanyń shetki kóshelerin jóndeý, kósheni jaryqtandyrý, qalanyń alys aýdandaryna mektep salý, turǵyn úi qurylysyn júrgizetin qurylys kompaniiasy tarapynan infraqurylym júrgizýge kómek suraý siiaqty birqatar saýaldar qoiylyp, tiisti jaýaptar berildi. Jiynda qala turǵyndary ákim Talǵat Qainarbekovtiń jumysyna qanaǵattarlyq degen baǵa berdi.
