Qyzylorda oblysy Syrdariia aýdanynda turatyn 99 jastaǵy soǵys ardageri Iahiia Tasyrov sailaý ýchaskesine ózi baryp, tańdaýyn jasady, dep habarlaidy "Ult aqparat".
Mańyzdy naýqanda qart jaýynger aýdan ortalyǵyndaǵy №155 sailaý ýchaskesinde alǵashqy bolyp daýys berdi. Ardager buǵan deiingi sailaý naýqandarynda da óz belsendiligimen kózge túsip júrgen bolatyn.
«Sailaý – memlekettiń árbir azamatynyń óz bolashaǵy úshin tańdaý bildirý quqyǵy. Men barlyq sailaýda osyndai belsendilik tanytyp kelemin. Alǵashqylardyń biri retinde tańdaý jasaimyn. Búgin de sol ádetimnen jańylǵan joqpyn», - dedi Iahiia Tasyrov.
Maidanger qariia saiasi naýqannyń sátti ótýine aq batasyn da berdi.
«Syrdariia aýdanynyń Qurmetti azamaty» Iahiia Tasyrov 1922 jyly Syrdariia aýdany A.Toqmaǵanbetov aýylynda dúniege kelgen. Stalingrad, Belarýs, Kýrsk qalalaryn, Polshany azat etýge qatysqan. Maidanger 120 jaýyngerden quralǵan avtomatshylar rotasynda bolǵan. Surapyl soǵys kezinde oń aiaǵyna oq tigen.
Elge kelgennen keiin orta mektepte áskeri daiarlyq páninen sabaq berdi. Odan keiingi jyldarda eńbegi Tereńózek, Jalaǵash aýdandyq mai zaýyttarynda jalǵasty. Beride otyn daiyndaý mekemesinde jumys istep, 1981 jyly zeinetkerlikke shyqqan.
