Qyzylorda oblysy Qazaly aýdany, Bekarystan bi aýylynyń turatyn 98 jastaǵy Qabaq Smaǵul koronavirýsqa qarsy ekpe saldyrdy, dep habarlaidy QazAqparat.
Maidanger densaýlyq zor bailyq ekenin alǵa tartty. Sondyqtan qazir álemdi jailaǵan aqýipti derttiń betin qaitarý úshin eldi ekpe qabyldaýǵa shaqyrdy.
«Qazir álem halqy pandemiianyń aýyr zardabyn tartyp keledi. Odan qutylýdyń basty joly - vaktsinatsiia. Men ǵasyrlyq jasqa qadam bastym. Dese de qai jasta da adam óziniń densaýlyǵyna mańyz berýi tiis. Sondyqtan koronavirýsqa qarsy vaktsina qabyldaýdy jón sanadym», - dedi qart maidanger.
1923 jyldyń 1 shildesinde dúniege kelgen Qabaq aqsaqal 1942 jyly soǵysqa attanǵan. Týla qalasyn azat etýge qatysqan. 1943 jyly aýyr jaralanyp elge oralǵan.
Beibit ómirde bilek sybana eńbek etti. Maidanger aǵartý úiiniń meńgerýshisi, aýyldyq keńestiń hatshysy laýazymyn atqardy. Esepshilik salasynda týra 40 jyl jumys jasady. Jubaiy Kúljan ekeýi on bala ósirip, el qataryna qosty. Balalarynyń barshasy joǵary bilim aldy. Bul kúnderi nemere-shóbere, shópshek súiip otyr.
Eldiń damýy úshin qyzmet jasaǵan maidanger kóptegen orden, medaldardyń iegeri.
Aita ketsek, oblysta vaktsinatsiianyń birinshi komponentimen egilgender sany – 329492 adamdy quraidy. Al vaktsinamen tolyqtai qamtylǵandar sany 271 173 adamǵa jetti.
