Búgin Qazaqstannyń halyq ártisi, teatr jáne kino akteri Iýrii Pomerantsev 97 jasqa toldy, dep habarlaidy QazAqparat.
Halyq ártisiniń bar ǵumyry teatrmen bailanysty. Osy salada eńbek etip kele jatqanyna 75 jyl toldy. Onyń 66 jyly Almatydaǵy Lermontov atyndaǵy akademiialyq drama teatrynda ótti. Osy ýaqytta 300-den asa keiipkerdiń beinesin sátti alyp shyqty. Sonyń ishinde Muhtar Áýezovtiń «Abai joly» romany boiynsha 1968 jyly qoiylǵan Abai dramasyndaǵy basty róli de bar.
Iýrii Pomerantsev 1923 jyly Kievte dúniege kelgen. Al biraz ýaqyt ótken soń onyń otbasy Qaraǵandyǵa qonys aýdarady. Ákesiniń qazasynan keiin oǵan jáne onyń anasyna Máskeýge kóshýge týra keldi jáne sol jaqtan maidanǵa attandy. Aýyr jaralanǵannan keiin, 1943 jyly Iýrii Borisov Almatyǵa kelip, óziniń akterlik mansabyn bastaidy. Akter teatr jáne kinoda ondaǵan rólderdi somdady. Degenmen, kórermender ony Sháken Aimanovtyń «Bizdiń súiikti dáriger» kartinasyndaǵy bas keiipker Anatolii Lavrovtyń rólinde jaqsy tanidy.
Eske salaiyq, 2018 jyldyń mamyr aiynda Iýrii Pomerantsevke eń joǵary dárejeli «Qazaqstannyń Eńbek Eri» ataǵy berildi. Sonymen qatar, dál sol jyly Resei Federatsiiasynyń Prezidenti Vladimir Pýtin akterge «Dostyq» ordenin tabystady.
Aita keteiik, Iu. Pomerantsev jasy 97-ge kelse de sahnadan túsken joq. Ol óz kórermenderin shynaiy obrazdarmen áli de qýantpaq.
