Almatyda M.Áýezov atyndaǵy Qazaq memlekettik drama teatryna 95 jyl tolýyna orai óner ordasyna ulttyq degen mártebe berildi, dep habarlaidy QazAqparat tilshisi.
Teatrdyń eń alǵashqy shyǵarmashylyq ujymy Qyzylorda qalasynda 1925 jyly qalyptasty. Al 1926 jyly M.Áýezovtyń «Eńlik-Kebek» pesasymen ashyldy.
1928 jyly el astanasy Almatyǵa aýysqanda teatr ujymy da kóshti. 1937 jyly teatrǵa akademiialyq degen mártebe berilip, 1961 jyly Muhtar Áýezovtyń aty berildi.
Saltanatty sharaǵa QR Mádeniet jáne sport ministri Aqtoty Raiymqulova qatysty.
«Kez-kelgen teatrdyń mereiin ústem qylatyn ardagerleri. «Ulttyq» degen mártebe osynda ter tókken birneshe býyn ártisteriniń eńbegi. Qazir teatrǵa jastar kelip jatyr. Olardyń árqaisysy el mádenietiniń damýyna ólsheýsiz úles qosyp jatyr. Teatr ujymyn 95 jyldyǵymen shyn júrekten quttyqtaimyn. Osy oraida «Ulttyq» degen mártebe óte úlken syilyq boldy dep oilaimyn», -dedi ministr Aqtoty Raiymqulova.
Odan bólek ministr 2021 jyly teatr ǵimaratyn qaita qalpyna keltirý jumystary bastalatynyn aitty.
«Teatr ǵimaraty óte eski. Biz qazir belgili reseilik sáýletshilermen kelisip qoidyq», - dedi ministr.
«Bizdiń qazaq árdaiym ónerge bas igen halyq. Óner ieleri osy teatrdyń damýyna ólsheýsiz úles qosyp keledi. Men teatrǵa kelgende biz osy teatrdyń 30 jyldyǵyn toilap jatqan edik. Ótkensiz búgin joq demekshi biz óz talantymyz ben tájiribemizdi keler urpaqqa qaldyratynymyz aian», - dedi teatrdyń kórkemdik jetekshisi Asanáli Áshimov.
Aita ketý kerek, QR Prezidenti Q.Toqaevtyń jarlyǵymen ministrlikke qarasty birqatar mádeni uiym ulttyq degen mártebe alǵan bolatyn.
M.Áýezov atyndaǵy Qazaq Ulttyq drama teatry, Qurmanǵazy atyndaǵy Qazaq Ulttyq akademiialyq orkestr, Abai atyndaǵy Qazaq Akademiialyq Ulttyq Opera jáne balet teatry, M.Lermontov atyndaǵy Orys memlekettik akademiialyq drama teatry, QR Ulttyq kitaphanasy osy mártebege ie boldy.
Keshke kieli sahnada «Abaidyń jumbaǵy» qoiylatyn bolady.
