9,4 million qazaqstandyq mobildi azamattar bazasyna tirkeldi, dep habarlaidy "Ult aqparat" «Azamattarǵa arnalǵan úkimet» memlekettik korporatsiiasynyń baspasóz qyzmetine silteme jasap.
«Azamattarǵa arnalǵan úkimet» memlekettik korporatsiiasynyń qyzmetkerleri karantin engizilgennen keiin naýryz aiynan beri 1,6 million azamatty mobildi azamattar bazasyna (MAB) tirkedi. Jalpy, mobildi quraldar arqyly memlekettik qyzmetterdi onlain alýǵa múmkindik beretin bul bazany qazirgi tańda 9,4 million qazaqstandyq qoldanýda.
«Azamattarǵa arnalǵan úkimet» KEAQ basqarma tóraiymy Ásemgúl Baltashevanyń aitýynsha, Qazaqstan boiynsha memlekettik korporatsiianyń birqatar mamany qaita daiarlaýdan ótip, videokeńesshi retinde azamattardy qashyqtyqtan MAB-na tirkeýge kirisken.
«Qazir 1414 sall-ortalyǵynda bir jarym myń adam jumys isteidi. Sonyń ishinde 400 videokeńesshi onlain tártipte turǵyndardy mobildi azamattar bazasyna tirkeýmen ainalysady. Osynyń nátijesinde koronavirýs indeti kezinde de bul úrdis toqtamai, sońǵy 5-6 ai ishinde memlekettik qyzmetterdi mobildi quraldar men egov.kz portaly arqyly alýshylardyń qatary 1,6 millionǵa artty», - deidi Ásemgúl Baltasheva.
MAB-qa tirkelgen tulǵalar memlekettik qyzmetterge eGovMobile qosymshasy, EgovKzBot2.0 telegram-boty arqyly qol jetkizip, sondai-aq proaktivti qyzmetter men basqa da servisterdiń igiligin kóre alady. Onyń ústine MAB qoldanýshylaryna qujattyń daiyn bolǵandyǵy nemese ETsQ merziminiń ótip bara jatqandyǵy týraly sms-habarlama keledi.
Aita ketý kerek, mobildi azamattar bazasyna egov.kz elektrondyq úkimet portalyndaǵy jeke kabinet arqyly nemese egov.kz virtýaldy keńesshisiniń kómegimen tirkelýge bolady.
Mobildi azamattar bazasyndaǵy tirkeýdi tekserý úshin egov.kz elektrondyq portalyndaǵy «Servister» bólimin qaraý kerek.
