Semeide toǵyz jyl buryn joǵalyp ketken bir jarym jastaǵy Aishanyń taǵdyry áli kúnge deiin belgisiz. Qyzdyń týystary isti qaita tergeýdi jáne balanyń joǵalýyna kináli adamdy anyqtaýdy talap etip otyr, dep habarlaidy ult.kz.
Týystarynyń aitýynsha, 2016 jyly otbasyndaǵy janjaldan keiin Aishanyń anasy qyzyn túnde Ertis ózenine aǵyzyp jibergenin kúieýine aitqan. Muny estigen ákesi ózen boiyn izdep, balanyń tek kúrteshesin tapqan.
Alaida týystary qyzdyń ózenge ketkenine kúmán keltiredi. Olar Aishany anasy basqa adamdarǵa satyp jiberýi nemese bireýge berip jiberýi múmkin dep sanaidy.
«Balany Ertiske aǵyzyp jiberdim degen. Baýyrym ózenge baryp izdedi, biraq balanyń tek kúrteshesin tapty. Biz qyzdy satyp jiberdi me, álde bireýge berdi me dep oilaimyz», – dedi Aishanyń ápkesi Zarina Serikbolsyn.
Qyzdyń ákesi de balasyn taba almai, aýyr kúizeliske túsken. Keiin ol ózine qol jumsap, qaitys bolǵan. Al Aishanyń anasy keiin basqa otbasyn qurǵan.
Qazir qyzdyń atasy nemeresi tiri bolýy múmkin dep esepteidi. Onyń sózinshe, otbasy isti qaita qaraýdy surap otyr.
Politsiianyń málimetinshe, Aishanyń anasy buǵan deiin kýáger retinde jaýap bergen. Qylmystyq quqyqbuzýshylyq belgileri anyqtalmaǵandyqtan, is boiynsha tergeý toqtatylǵan. Alaida turǵyndardyń shaǵymynan keiin muraǵatqa jiberilgen is toǵyz jyldan soń qaita qarala bastaǵan.
Aishanyń qazirgi qaida ekeni jáne onyń taǵdyry ázirge belgisiz.
