Siriiaǵa jihadqa ketpekshi bolǵan 9 synyp oqýshysyn meshit qyzmetkerleri qaitaryp qaldy. Bul oqiǵa elimizdiń batys óńirinde bolǵan.
Jasóspirimdi raiynan qaitarýǵa kúsh salǵan teolog, dintanýshy, Nur Múbárak Egipet Islam mádenieti ýniversitetiniń doktoranty, respýblikalyq aqparattyq nasihat tobynyń múshesi Serik Enshibai osy oqiǵany aityp berdi.
«Men «Shapaǵat» úkimettik emes uiymynda eńbek etip júrgenimde meshit imamy shaqyrdy. Barsam, Siriiaǵa ketpek bolǵan 9 synyp oqýshysymen kezdesýge shaqyrǵan eken. Áńgimeden baiqaǵanymdai, bala ózi «Siriiaǵa ketkim keledi» dep áleýmettik jelide jazba qaldyrǵan. Artynsha oǵan birneshe adam bailanysqa shyqqan. Telefon nómirin surap, sheteldik tólqujat jasaý, jolǵa jumsalatyn qarajat, kimderden qaryz suraý kerek, ne dep aitý kerek degen siiaqty keńes bergen. «Qaida ketetinińdi ashyq aitpa, Mysyrǵa oqýǵa ketemin de» dep úiretken. Oqýshy endi ketemin dep júrgende meshitte imamdardyń ýaǵyzyn estigen. Áli oi-sanasy qalyptaspaǵan jasóspirim bala imamnyń «Siriiaǵa barmańyzdar, ol jaqta musylmanshylyqtyń iisi de joq, ol jaqta islam dinin saiasat quraly retinde paidalanady» degen ýaǵyzynan oilanyp baryp, imamǵa jolyqqan», - dedi Serik Enshibai.
Oqýshymen teolog, psiholog mamandar birneshe ret kezdesken.
Psihologtardyń pikirinshe, balanyń miy teris aǵymǵa ýlanbaǵan.
«Balada dini túsinik joq. Sanasy ýlanbaǵan. Salafizm, ýahabizm siiaqty aǵymdardan habary joq. Ata-anasy ajyrasqan bolyp shyqty. Anasy basqa bireýge kúieýge tigen. Bálkim jalǵyzdyqtan ba, bálkim bir ómirine ózgeris engizgisi keldi me, áiteýir Siriiaǵa ketem dep bel býǵan. «Men sharshadym. Otbasynda jylý joq» degen jaýap aldyq», - dedi teolog.
9 synyp oqýshysy kúizeliske túsip janyna jeleý bolatyn jan taba almai júrgende áleýmettik jeliden, internetten Siriiadaǵy baqytty ǵumyr týraly rolikter kórgen.
Bul oqiǵadan soń teologtar men psihologtar balanyń ata-anasymen birneshe márte kezdesip, áńgime-dúken qurǵan. Nátijesinde oqýshy qoǵamǵa beiimdelip, áleýmettik ortaǵa oraldy.
