Frantsiianyń Renn qalasy men Almaty baýyrlastyǵynyń 30 jyldyǵy aiasyndaǵy velosherý aiaqtaldy, dep habarlaidy QazAqparat.
Biyl Almaty qalasy men Frantsiianyń Bretan aimaǵynyń astanasy Renn qalasy arasyndaǵy baýyrlastyqqa 30 jyl toldy. Osyǵan orai, 44 jastaǵy Loran Mae óz elinen Almaty qalasyna deiin velosherý ótkizdi.
3,5 jarym ai ishinde 9 myń shaqyrym júrip ótken saiahashty velosherýin Almaty qalasynda aiaqtady.
Saiahatshyny qalaǵa kire beriste «Almaty Cycling Team» kontinentaldy komandanyń velosipedshileri qarsy alyp, «Qazaqstannyń Táýelsizdigi» monýmentine alyp bardy. Ol jerde qala ákimshiligi ony qarsy aldy. Almaty qalasy ákiminiń orynbasary Erjan Babaqumarov Almaty men Renniń arasyndaǵy baýyrlastyq Táýelsizdiktiń tańynda, 1991 jyly bastalǵanyn atap ótti. Óz kezeginde velosaiahatshy Loran Mae Renn qalasynyń meri Natali Apperdiń hatyn oqyp berdi.
«Baýyrlastyǵyna 30 jyl tolǵan Renn men Almaty yntymaqtastyq pen dostyqty odan ári nyǵaitýǵa nietti. Loran Maeniń erligi – osynyń aiqyn dáleli. Baýyrlastyǵymyz, dostyǵymyz nyǵaia bersin», - dedi Frantsiianyń Bas konsýly Aleksis Shahtahtinskii.
«Almaty-Renn jáne álem qalalary dostyǵy qoǵamynyń» vitse-prezidenti Aigúl Qasymbek eki qala arasyndaǵy dostyqty nyǵaitý maqsatynda qandai sharalardyń júzege asyrylyp jatqanyn jetkizdi. Onyń aitýynsha, Almaty mektepteri men joǵary oqý oryndarynda frantsýz tili úiretiledi.
Aita keterligi, Loran Mae 15 jasynan bastap Uly Jibek jolyn kórýdi jáne onymen júrip ótýdi armandaǵan eken.
«Qazaqstanǵa kelgen boida bári jaqsy ótip jatyr. Men Shymkent, Taraz, Túrkistan, Shý qalalarynda boldym jáne qazaqtardyń meni óte jyly qarsy alǵanyn aitqym keledi. Eýropada bolǵanymda jańbyr kóp jaýdy, keide qar astynda qalǵan kezderim boldy. Biraq, Qazaqstanǵa kelgennen keiin barlyq qiyndyqtar men qolaisyz aýa raiy artta qaldy. Men velosipedpen saiahatqa shyqqan kezde úsh maqsatty aldyma qoidym. Renn-Almaty qalalarynyń 30 jyldyq baýyrlastyǵyn, Qazaqstan Respýblikasy Táýelsizdiginiń 30 jyldyǵyn atap ótý jáne sizdiń eldi kórý jónindegi kópten bergi armanymdy iske asyrý. Sonyń barlyǵy oryndaldy», - dedi Loran Mae.
