9 qarashada Pavlodar oblysynda 9 blok beket qoiylady. Bul týraly onlain baspasóz máslihatynda Pavlodar oblysy politsiia departamenti basshysynyń birinshi orynbasary Jasqairat Qaiyrov málim etti, dep habarlaidy Pavlodarnews.kz.
- Pavlodar qalasynyń aýmaǵynda 5 blok beket qoiylady. Beketter kóktemdegi oryndaryna ornatylady. Aqsýda 2 blok beket qoiylady. Olar Aqsý-Evgenevka baǵytyndaǵy jolda jáne Aqsý kenti men MAES mańynda bolady. Sondai-aq indet órship turǵan Shyǵys Qazaqstan oblysymen shekaralasatyn Aqqýly jáne Mai aýdandarynda blok beketter ornatylady, - dedi Jasqairat Qaiyrov.
Blok beketterden pvlinfo.kz ruqsat berý saityna tirkelgender, jumys ornynan anyqtamalary bar adamdar jáne meditsinalyq qyzmet alýǵa kelgender ǵana ótkiziledi.
- Oǵan qosa, oblysta monitoring toptarynyń sany 22-den 40-qa deiin jetkiziledi. Otbasylyq jáne basqa da sharalar ótkizýge, karantindik talptardy saqtaýǵa qatysty qatań baqylaý jasalady. Ereje buzýshylyqtar anyqtalsa, 83 myńnan 4 million teńgege deiin aiyppul salynady, - dedi politsiia departamenti basshysynyń birinshi orynbasary.
Sonymen qatar, qalaaralyq, aýdanaralyq jolaýshylar tasymaly toqtaidy. Tek qala mańyndaǵy jáne qala ishindegi qoǵamdyq kólikter jumys kúnderi ádettegidei qozǵalysyn jalǵastyrady. Al, demalys kúnderi toqtaidy.
- Temir jol qatynasyna kelsek, buǵan deiin Pavlodar-Almaty baǵytyndaǵy №31 poiyz kún saiyn qatynaityn. Endi kún aralap júretin bolady. Ýaqyttary keiin habarlanady. Ol poiyz tek iri stantsiialarda ǵana toqtaidy. Olar: Pavlodar, Ekibastuz, Aqsý, Bozshakól stantsiialary. Ushaqpen ushý kezinde jáne poiyzdarǵa minerde PTsR nátijesi qajet emes, - dedi Pavlodar oblysy jolaýshylar kóligi jáne avtomobil joldary basqarmasy basshysynyń m.a. Diana Muhanova.
