Túrkistan oblysynyń politseileri 80 jastaǵy qariianyń aýlasynan 62 kelige jýyq egilgen «kóknár» ósimdigin tapty, dep habarlaidy Polisia.kz.
Shardara aýdandyq politsiia bólimshesine jergilikti turǵyn aýlasynda esirtki ósiredi degen habarlama kelip túsedi. Muny tekserý maqsatynda KPB-niń qyzmetkerleri jedel áreket etken. Nátijesinde 80 jastaǵy qarttyń úiiniń aýlasynan kútip-baptap, ósirilgen esirtkige uqsas hosh iisti 5,5 myńǵa jýyq túp tabyldy. Aiǵaqty zat retinde tárkilenip alynǵan ósimdik 50 qap boldy. Odan bólek, aýladaǵy tapshan ústinen mata qaltashaǵa salynǵan, ózine tán hosh iisi bar aiǵaqty zattar alyndy.
Atalǵan jait sotqa deiingi tergep-tekserýdiń biryńǵai tizilimine engizilip, QR Qylmystyq kodeksiniń 296-babymen (esirtki, psihotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý) tirkelip, qylmystyq is qozǵaldy. Birqatar saraptama taǵaiyndaldy. Zertteý qorytyndysyna sáikes atalmysh tórt sottyq jerge egilgen ósimdikter, salmaǵy 62 keli jýyq «Uiyqtatatyn kóknár» bolyp shyqty. Al, tapshan ústinen alynǵan zattyń jalpy salmaǵy 45 gramm «keptirilgen kóknár sabany» ekeni anyqtaldy. Kúdikti qariia óziniń qylmysyn tolyq moiyndap, ósimdikterdi jeke basyna paidalaný úshin ekkendigin aitty. Tergeý barysynda anyqtalǵandai, kúdikti 80 jastaǵy turǵyn buryn osy tektes qylmysty jasap, úsh jylǵa sotty bolǵan.
