Jambyl oblysynyń politseileri segiz jyl buryn jasalǵan qaraqshylyq qylmystyń betin ashty. Qylmysqa qatysy bar 41 jastaǵy er adam qolǵa tústi, dep habarlaidy ult.kz.
Ishki ister ministrliginiń málimetinshe, 2018 jyly Merki aýdanyndaǵy avtojoldardyń birinde belgisiz er adam áielge shabýyl jasaǵan. Qaskói jábirlenýshini kúsh qoldanyp uryp-soǵyp, onyń altyn áshekeilerin tartyp alyp, oqiǵa ornynan izin sýytqan.
Oqiǵadan keiin politsiia jedel-izdestirý jáne tergeý jumystaryn bastaǵan. Jábirlenýshiniń sipattamasy negizinde kúdiktiniń fotoroboty jasalǵanymen, sol kezde onyń jeke basyn anyqtaý múmkin bolmaǵan. Alaida isti ashý jumystary toqtatylmaǵan.
Arada segiz jyl ótken soń ashylmaǵan qylmystar qaita tekserilip, politseiler fotorobottaǵy adamdy tanyǵan. Júrgizilgen jedel sharalar nátijesinde kúdiktiniń kim ekeni anyqtalyp, onyń júrgen jeri belgilendi.
Prokýratýranyń úilestirýimen politsiia 41 jastaǵy er adamdy ustady. Qazir atalǵan derek boiynsha Qazaqstan Respýblikasy Qylmystyq kodeksiniń 192-baby 1-bóligi («Qaraqshylyq») boiynsha sotqa deiingi tergeý júrgizilip jatyr.
Aita keteiik, buǵan deiin Qaraǵandyda qaraqshylyq shabýyl men urlyq jasady degen kúdikpen er adamnyń ustalǵany habarlanǵan bolatyn.
