Biylǵy jyldyń 8 aiynda memlekettik biýdjet 5 trln teńgeden asa salyq túsimderimen tolyqty, dep habarlaidy "Ult aqparat".
«Biylǵy qańtar-tamyz ailarynda memlekettik biýdjetke salyq túsimderi boiynsha jospar 91,4%, onyń ishinde respýblikalyq biýdjet 80,9% jáne jergilikti biýdjet 116,4% atqaryldy. Esepti kezeńde memlekettik biýdjetke túsken salyq túsimderi ótken jyldyń uqsas kezeńine qaraǵanda 11,1%-ǵa (nemese 646,7 mlrd.teńgege) tómendeýmen 5 158,3 mlrd teńgeni qurady. Onyń ishinde respýblikalyq biýdjet boiynsha 24,4 paiyzǵa (nemese 1 037,6 mlrd teńgege) kemidi, jergilikti biýdjet boiynsha 25,1 paiyzǵa (nemese 390,9 mlrd teńgege) ósti», - delingen QR QM Memlekettik kirister komiteti baspasóz qyzmetiniń málimetinde.
Tómendeýdiń sebebi syrtqy jáne ishki faktorlarǵa bailanysty ekonomikalyq ahýaldyń nasharlaýy bolyp otyr.
2019 jyldyń uqsas kezeńimen salystyrǵanda negizgi eksporttyq pozitsiialarǵa, onyń ishinde munaiǵa 36,5%, myryshqa 18,3%, aliýminiige 10,9%, qorǵasynǵa 9,3%, mysqa 5,9% baǵanyń tómendeýi baiqalady.
«2020 jylǵy 8 aida úshinshi eldermen taýar ainalymy 11,9 paiyzǵa azaidy (eksport 15,4%-ǵa, import 4,5%-ǵa). Onyń ishinde taýar ainalymynyń 20,7 paiyzǵa tómendeýi aǵymdaǵy jylǵy tamyzǵa kelip otyr (eksport 34,9%-ǵa azaidy, import 3,7%-ǵa ósti)», - dep atalyp ótken vedomstvo habarlamasynda.
Biylǵy 8 aida jergilikti biýdjetke túsetin salyq túsimderi boiynsha jospar 275 mlrd teńgege artyq, 116,4% -ǵa oryndaldy.
Jergilikti biýdjet josparynyń artyǵymen oryndalýyna korporativti tabys salyǵynyń jergilikti biýdjetke berilýi áser etti.
