"QazAvtoJol "UK" ókilderi 76 millionnyń Oral-Bozylyq tasjolyna qatysty pikir bildirdi, - dep habarlaidy Massaget.kz portaly "Moi GOROD" basylymyna silteme jasap.
Vedomstvo málimetinshe, barlyq jumys tehnikalyq qujattamaǵa sáikes oryndalǵan.
Al "Ádildik joly" RQB filialynyń ókili Baýyrjan Ahmetjan Instagram-paraqshasynda 18 qarashada qoǵam qairatkerleri Báiterek aýdany Chývashinskoe aýylyna barǵanyn jazǵan. Olar úlken shuńqyrlary bar jańa tasjoldy kórgen.
Sonymen qatar, ol nysan boiynsha jóndeý jumystary jasalǵanyn, jumystar aiaqtalǵanyn aitqan. Alaida jol jiegi arnaiy tehnikamen nyǵaitylmaǵan. Sondyqtan júk kólikteriniń izderi men shuńqyrlary barlyq jerde qalǵan.
"Memlekettik satyp alý portalynan osy joldyń jiekterin, sezderdiń sońyn nyǵaitýǵa jáne sezderdi jaýyp, qalyńdyǵy bes santimetrge deiin bolýy úshin 76 million teńge bólingenin bildik. Biraq is júzinde bul aqsha sheneýnikter men tekserýshilerdiń qaltasyna tústi", - dep jazdy Baýyrjan Ahmetjan.
"QazAvtoJol "UK" AQ joldy jóndeýge tapsyrys berýshi sanalady. Kompaniianyń baspasóz qyzmeti ókilderi aqparatty joqqa shyǵardy.
"Biyl "TJS" JShS ("Túrkistan jol servis") merdigerlik uiymy tehnikalyq qujattamaǵa sáikes ortasha jóndeý jumystary aiasynda jalpy uzyndyǵy 28 shaqyrym bolatyn respýblikalyq mańyzy bar A-32 Oral-RF shekarasyndaǵy (Bozylyqqa deiin) joldy jóndedi. Barlyq jumys tehnikalyq qujattamaǵa sáikes oryndaldy. Soǵan sáikes, jol jiekterin nyǵaitý úshin osy materialdy qoldanyp, jol tósemin frezerleý jumystary júrgizildi. Tiisinshe, jol jiekterin nyǵaitý úshin material satyp alýǵa basqa qarajat bólinbedi. Barlyq frezerlengen material osy avtojoldyń jiekterin nyǵaitý úshin qaita paidalanyldy. Merdiger uiymǵa tólem oryndalǵan jumystar aktisi jáne KS-3 anyqtamasy negizinde tolyq jasaldy. Jazbada aitylǵan 76 million - merdiger uiymnyń jumysy úshin tólem, material satyp alynǵan joq", - dedi "QazAvtoJol "UK" AQ baspasóz qyzmeti ókili.
Sondai-aq, kompaniia ókili nysan paidalanýǵa berilgennen keiin kepildik merzimi (eki jyl) bastalatynyn túsindirdi. Kepildik merzimi sheńberinde eki jyl ishinde merdiger nysandy paidalanýǵa bergennen keiin týyndaǵan barlyq aqaýdy joiady. Jol jiekteri qosymsha profildenip, bári retke keltiriledi.
