Nur-Sultan qalasynyń Almaty aýdandyq soty 74 mln teńge jymqyrǵan «Astana REK» AQ qyzmetkerlerine úkim shyǵardy. Bul týraly elordanyń Sybailas jemqorlyqqa qarsy is-qimyl departamentiniń baspasóz qyzmetinen málim etti, dep habarlaidy "Ult aqparat".
Nur-Sultan qalalyq Sybailas jemqorlyqqa qarsy is-qimyl departamenti «Astana – Aimaqtyq elektr jelilik kompaniiasynyń» laýazymdy qyzmetkerlerine qatysty qylmystyq is boiynsha tergeý júrgizgen bolatyn.
6 qańtar kúni Nur-Sultan qalasynyń Almaty aýdandyq №2 soty «Astana-REK» AQ Basqarma tóraǵasynyń orynbasary men onyń qol astyndaǵy úsh qyzmetkerine – elektr energiiasyn tutynýdy baqylaý qyzmetiniń bastyǵy jáne ýchaskeler bastyqtaryna úkim shyǵardy. Senip tapsyrylǵan elektr energiiasyn shyǵyndaǵan olardyń báriniń úsh jarym jylǵa bas bostandyǵy shekteldi. Olar sonymen qatar 100 saǵattyq májbúrli eńbekke tartylady.
«Kompaniianyń laýazymdy qyzmetkerleri kásipkerlik sýbektilerimen aldyn ala sóz bailasyp, jymqyrylǵan elektr qýatyn shyǵyn retinde jazyp otyrǵan. Keiin osy jetispeýshilik elektr qýatyn taratý tarifiniń ósýine alyp kelgen. Tergeý barysynda osy qylmystyń saldarynan 74 mln teńge shyǵyn keltirilgeni anyqtaldy. Sottalýshylar shyǵyndy tolyq ótedi», - delingen aqparatta.
