Foto: Ozgeris.info
Áleýmettik jelide 2022 jyldyń qarashasynda 7 jylǵa bas bostandyǵynan aiyrylyp, biraq jazanyń oryndalýy 3 jylǵa keiinge qaldyrylǵan Atyraý oblysy ákiminiń burynǵy orynbasary Baqytgúl Hamenovanyń videosy tarady, dep habarlaidy Ult.kz Ozgeris.info portalyna silteme jasap.
"Atyraýda para alǵany úshin sottalǵan oblys ákiminiń burynǵy orynbasary jáne burynǵy májilis depýtaty Baqytgúl Hamenova toida kózge tústi. Videoda ol sheneýnikter men politseilerdiń arasynda qurmetti qonaq retinde birinshi qatarda tur", – delingen taraǵan videonyń sipattamasynda.
Atyraý oblystyq sotynyń "QazAqparat" agenttigine bergen jaýabynda aitylǵandai, Hamenovaǵa qatysty jazanyń oryndalýy úsh jylǵa shegerilgen.
2022 jyldyń qarashasynda sot Baqytgúl Hamenovany kináli dep tanyp, oǵan 7 jyl bas bostandyǵynan aiyrý jazasyn taǵaiyndaǵan, biraq eki kámeletke tolmaǵan balasy bar bolǵandyqtan, jazanyń oryndalýyn 3 jylǵa keiinge qaldyrǵan.
Bul is boiynsha Atyraý oblysynyń mádeniet basqarmasynyń burynǵy basshysy Aqylbek Rysqaliev jáne "Balqytý" JShS direktory Ómirtai Adamov ta sottalǵan edi.
Olarǵa Abai eskertkishin ornatýǵa arnalǵan kelisimshartty jasaý úshin 4,5 million teńge kóleminde para alý jáne berý faktisi boiynsha aiyp taǵylǵan.
Sottyń sheshimimen Baqytgúl Hamenova 7 jylǵa sottaldy (jazany óteý keiinge qaldyryldy), Aqylbek Rysqaliev 7 jylǵa sottaldy, Ómirtai Adamov – 4 jylǵa bas bostandyǵynan aiyryldy (zalda qamaýǵa alyndy).
Baqytgúl Hamenova men onyń advokaty apelliatsiialyq shaǵym bergen, alaida sot onyń úkimin kúshinde qaldyrǵan.
Al eki basqa figýranttyń jazasy jeńildetildi. Aqylbek Rysqalievtiń jazasy 7 jyldan 2 jylǵa qysqartyldy. Ómirtai Adamovtyń jazasy 4 jyldan 1 jyl 6 aiǵa deiin azaityldy.
