Qazirgi kezde memlekettik organdar men bankter «7-20-25» baǵdarlamasyn pysyqtap jatyr. Degenmen, Ulttyq bank arzan ipotekany berý merzimin belgilep qoidy, dep habarlaidy QazAqparat tilshisi.
«7 paiyzdyq ipotekany berý jumystary shamamen jyldyń ortasynda bastalady. Maýsym aiynyń aiaǵyna deiin barlyq quqyqtyq-uiymdastyrýshylyq sharalaryn aiaqtaimyz degen jospar bar. Sodan shilde-tamyz ailarynda bankter arzan ipotekany berýdi bastaidy», - dedi Ulttyq bank tóraǵasynyń orynbasary Oleg Smoliakov QazAqparat tilshisine bergen suxbatynda.
Onyń aitýynsha, jańa baǵdarlama aiasynda jańadan qurylatyn kompaniia bankterden ipotekalyq nesielerdi satyp alady da, jyldyq mólsherlemeni 7 paiyzǵa deiin túsiredi. Al nesieni alǵan azamatttar barlyq tólemderin bankke jasai beredi.
«Ipotekalyq nesielerdiń alǵashqy pýly jasalǵan boida biz onyń barlyǵyn satyp alýǵa kirisemiz. Árine, ár adamnyń tólem qabilettiligine basa nazar aýdarylady. Endi, memlekettik baǵdaralamalarda áskeriler, áleýmettik jaǵynan az qamtylǵan azamattar jáne taǵy basqa sanattar bar. Jańa baǵdarlamada ondai kategoriialar bolmaidy. Biz barlyq zaemdarmen jumys isteitin bolamyz», - dep atap kórsetti O.Smoliakov.
Bas bankirdiń orynbasary «7-20-25» baǵdarlamasy aiasynda qurylatyn jańa kompaniia men «Nurly jerde» otyrǵan Qazaqstannyń ipotekalyq kompaniiasynyń aiyrmashylyǵyn da jetkizdi. Onyń aitýynsha, QIK ipotekalyq zaemdardy sýbsidiialaidy. Al jańa qurylatyn kompaniia ol nesielerdi satyp alatyn bolady.
Aita keteiik, Úkimettiń búgingi otyrysynda Ulttyq banktiń tóraǵasy Daniiar Aqyshev «7-20-25» baǵdarlamasynyń jobasyn tanystyrdy. Bas bankir 7 paiyzdyq ipotekanyń basty talabyn da jariialady.
