Ulttyq bank basshysy Daniiar Aqyshevtyń paiymdaýynsha, "7-20-25" baǵdarlamasy Qazaqstannyń jyljymaityn múlik naryǵyna áser etpeidi. Ol bul pikirimen Almatydaǵy brifing kezinde bólisti.
"Baspana baǵasynyń ózgerýi kóptegen faktorǵa bailanysty – áýeli, baspana usynysy men suranysyna táýeldi. Álbette, laiyqty usynys bolsa, suranysty kóbeitkeli otyrmyz, al salýshylar osy suranysty qamtamasyz etýge áleýetimiz jetedi deidi, demek osy tepe-teńdikti eskeretin bolsaq, baspana baǵasynda qandai da bir ózgeris bolady dep oilamaimyn, sebebi naryqta suranys pen usynys arasynda aitarlyqtai aiyrmashylyq bolmaidy", — dedi Aqyshev tilshilerdiń suraǵyna jaýap berip.
Ulttyq bank tóraǵasynyń aitýynsha, "7-20-25" baǵdarlamasy aiasynda satyp alynatyn baspana baǵasyna qoiylatyn shekteý naryqtaǵy turǵyn úi qunynyń artýyna kedergi bolady.
"Ekinshiden, baǵdarlamada baspananyń maksimaldy quny belgilengen. Iaǵni, baǵdarlama boiynsha satyp alynatyn páterdiń baǵasy shekteýli. Biz qoljetimdi baspananyń ortasha baǵasyn eskerdik, sol sebepti eń joǵarǵy shek engizildi. Bul da jalpy baspana baǵasynyń artýyna kedergi jasaidy", — dep túsindirdi Daniiar Aqyshev.
Aita ketsek, "7-20-25" turǵyn úi baǵdarlamasy boiynsha ár jumys isteitin qazaqstandyq nesiege baspana satyp ala alady. Qazaqstandyqtar kelesi sharttarmen ipotekalyq qaryz alý múmkindigine ie bolmaq: nesie boiynsha syiaqy mólsherlemesi – jylyna 7%-dan, bastapqy jarna — 20%-dan aspaidy, nesieni tóleý merzimi – 25 jylǵa deiin. Ipotekalyq baǵdarlama boiynsha nesieler tek ulttyq valiýtamen beriledi.
