«7-20-25» baǵdarlamasyna biýdjetten bólingen 1 trln teńgeniń 36,2%-y igerilgen. Bul týraly QR Ulttyq bankiniń baspasóz qyzmeti «QazAqparat» halyqaralyq aqparat agenttiginiń saýalyna mamandary bergen jaýabynda aitty.
«7–20–25» baǵdarlamasy boiynsha kreditteýdiń indikativtik kólemi 1 trln teńge mólsherinde aiqyndaldy. Baǵdarlama nesiege bólingen qarjy tolyq igerilgenshe jalǵasady. Baǵdarlama iske qosylǵannan beri 367 mlrd teńgeniń nesiesi berildi. Sonyń arqasynda 30 myńnan astam otbasy jeke baspanaǵa ie boldy. Osylaisha, búgingi tańda baǵdarlamanyń nysanaly kórsetkishiniń 36,2%-y igerildi», - dep jazylǵan jaýapta.
Banktiń bapasóz qyzmetiniń málimeti boiynsha, 2018 jyldan bastap 2021 jyldyń shildesine deiin jeke qurylys salýshylar 290 873 turǵyn úi salǵan. Sonyń tek 10,3%-y «7–20–25» baǵdarlamasy boiynsha satyp alynǵan.
«Salynǵan turǵyn úidiń shamamen 80%-yn halyq qurylys kezeńinde satyp alatynyn, sondai-aq turǵyn úidi naryqta ótkizýdiń jalpy kólemindegi baǵdarlamanyń úles salmaǵyn eskersek, nysanaly kórsetkishke qol jetkizý uzaq ýaqytty talap etedi», - dep jazady Ulttyq bank mamandary.
