Ulttyq bank tóraǵasy Daniiar Aqyshev jańa "7-20-25" ipotekalyq baǵdarlamasy boiynsha baspana alý úshin ne isteý qajettigin aitty, dep habarlaidy Sputnik Qazaqstan tilshisi.
"Ulttyq bank qazir memleket basshysynyń bes áleýmettik bastamasynyń aiasynda "7-20-25" baǵdarlamasyn ázirlep jatyr. Men azamattardyń osy baǵdarlamaǵa qatysý úshin ne isteý qajet ekenin aitqym keledi", — dedi búgin parlamenttik tyńdaý barysynda Daniiar Aqyshev.
Birinshiden, azamat satyp alatyn baspanasyn tańdaý kerek. Bul oraida baǵdarlamada úidiń shekti quny bekitiletinin eskerý kerek. Mysaly, Astana, Almaty, Aqtaý, Atyraý qalalarynda baspananyń eń joǵary baǵasy 25 million teńge, al basqa óńirlerde 15 million teńge bolady.
Budan bólek, Aqyshevtyń aitýynsha, bastapqy kezeńde baǵdarlama aiasynda jańa úilerge ǵana ipoteka beriledi.
"Ekinshiden, azamat baǵdarlamaǵa qatysatyn bankke kelip, ótinish pen qajetti qujattardy tapsyrý qajet. Biz taiaýda qarjylyq kórsetkishteri joǵary, filialdyq júiesi men azamattarǵa qyzmet kórsetý sapasy jaqsy damyǵan bankterdi anyqtaimyz", — dedi ol.
"Úshinshiden, kredit alý úshin azamattyń tabysy bolýy kerek. Tórtinshiden, onyń menshiginde baspanasy bolmaýy tiis, bul talapty biz qazir qarastyryp jatyrmyz. Ulttyq bank osy erejelerdi halyqqa túsindirip, belsendi jumys isteýge bar kúshin salady", — dedi Aqyshev.
Aita keteiik, prezident Nursultan Nazarbaev "7 – 20 – 25" jańa turǵyn úi baǵdarlamasyn usynǵan edi. Jumys isteitin árbir qazaqstandyq tómendegidei sharttar boiynsha teńgemen nesie alý múmkindigine ie bolady. Nesie ósiminiń mólsherlemesi qazirgidei 14-16 emes, jylyna 7 paiyzdan aspaidy. Bastapqy jarna baspana qunynyń 20 paiyzy mólsherinde belgilenedi. Nesie alýshynyń ai saiynǵy tólemin azaitý úshin onyń merzimi 10-15 emes, 25 jylǵa deiin bolady.
Bankterden kreditterdi satyp alatyn operator qurylyp, ol "Baspana" ipotekalyq kompaniiasy dep atalmaq. Baǵdarlama 2018 jyldyń ekinshi jartysynan bastap iske qosylady.
