2016 jyly etikalyq normalardy saqtamaǵany úshin 200 memlekettik qyzmetshi jaýapkershilikke tartyldy. Bul týraly Ortalyq kommýnikatsiialar qyzmetinde «B» korpýsynyń memlekettik ákimshilik qyzmetkerlerin keshendi attestattaý» taqyrybynda ótken baspasóz konferentsiiasynda Memlekettik qyzmet isteri jáne sybailas jemqorlyqqa qarsy is-qimyl agenttik tóraǵasynyń orynbasary Aigúl Shaiymova málim etti.
Spikerdiń aitýynsha, biylǵy attestattaýdyń burynǵylardan ereksheligi, ol qyzmetkerlerdiń biliktiligin arttyrý úshin olardyń kásibi daiarlyǵy men múmkindikterin anyqtaýǵa baǵyttalǵan.
«Bul jalpy búgingi qoǵamnyń suranystary men halyqqa qyzmet etý qaǵidalaryna jaýap beretin memlekettik apparat qalyptastyrý úshin qajet», – dep atap ótti A.Shaiymova.
Ol sondai aq biyl «b» korpýsynan shamamen 65 myń memlekettik qyzmetker keshendi attestattaýdan ótetinin málimdedi.
«Ortalyq deńgeide – sarapshylardan ministrlik pen vedomstvo departamentteriniń direktorlaryna deiin, oblystyq deńgeide – mamandardan jergilikti atqarýshy jáne aýmaqtyq organdardyń basshylaryna deiin, al aýdandyq deńgeide – aýyl ákimdikteriniń jetekshi mamandarynan aýdan ákimderiniń orynbasarlaryna deiin jáne mamandardan aýmaqtyq organ basshylaryna deiin attestattaýdan ótetin bolady», – dedi agenttik tóraǵasynyń orynbasary.
Sondai-aq ol attestattaýdan bosatylatyn memlekettik qyzmetkerler týraly aityp ótti.
«Bul sanatqa dekrettik demalystaǵy, aiaǵy aýyr áielder, sondai-aq 3 jasqa tolmaǵan balalary bar áielder, 14 jasqa tolmaǵan balalardy tárbielep otyrǵan jalǵyzbasty analar men ákeler jatady. Sonymen qatar, zeinetaldy jastaǵy qyzmetkerler, «A» korpýsynyń kadrlyq rezervinde turǵandar jáne memlekettik qyzmetke alǵash ret alynyp, alty aidan az ýaqyt jumys istegen qyzmetkerler attestattaýdan ótpeidi», – dep túsindirdi A.Shaiymova.
