Qazaqstannyń soltústik óńirlerine jatatyn Aqmola, SQO, Pavlodar, Qostanai oblystaryna kóshýge biyl 622 oralman otbasy niet bildirip otyr. Bul týraly Úkimette ótken baspasóz máslihatynda QR Eńbek jáne halyqty áleýmettik qorǵaý ministri Tamara Dúisenova málim etti, dep habarlaidy QazAqparat tilshisi.
«Bizde shetelden jumys kúshin tartý baǵytynda bólinetin kvotalar bar. Biyl ondai kvotalarǵa ótinim berýshilerdiń sany 41 myń. Iaǵni, bul kórsetkish - ekonomikalyq belsendi turǵyndardyń 0,6 paiyzy. Ekinshiden, Qazaqstannyń soltústigine oralmandardy kóshirý boiynsha beriletin kvotalar bar. Biyl 622 oralman otbasy Qazaqstannyń soltústik jáne ortalyq óńirlerine kóshýge ótinim berdi. Álbette, olarǵa naqty mamandyq boiynsha jumystar usynylmaq», - deidi Tamara Dúisenova.
Ministr sonymen birge, aimaqtyq deńgeide, iaǵni bir oblystan ekinshi oblysqa kóship kelýshilerdiń sany artyp bara jatqanyn atap ótti.
«Jumys oryndary az óńirlerden kóp aimaqtarǵa kóshýge niet bildirgender kóbeiip keledi. Biyl Qazaqstannyń basqa óńirlerinen soltústiktegi Qostanai, Pavlodar, SQO, Aqmola oblystaryna kóshýge 1706 otbasy niet bildirdi. Byltyr soltústik óńirlerge kóshýge ózge oblystardan 380 otbasy ǵana ótinim bergen bolatyn. Atalǵan óńirler kóship kelýshilerge naqty qandai jumys oryndary bar ekeni, baspana máselesi týraly aqparat berip jatyr», - dedi ministr.
