Astanada 60-tan astam adamdy aldap, jarty milliard teńgeden astam shyǵyn keltirgen áiel sottaldy, dep habarlaidy ult.kz.
Elordada birneshe márte alaiaqtyq jasaǵany úshin kináli dep tanylǵan áielge qatysty sot úkimi zańdy kúshine endi. Bul týraly Astana qalasynyń prokýratýrasy habarlady.
Tergeý málimetinshe, áiel ózine sengen kórshileri, dostary jáne eski tanystaryn aldaý shemasyn uiymdastyrǵan. Ol «tanystary arqyly» ipotekany jedel rásimdep, páter alyp berýge nemese dekrettik tólem kólemin kóbeitýge kómektesetinin aityp, azamattardan aqsha alǵan. Keibirine nesie rásimdetip, tipti jyljymaityn múlkin kepilge qoiýǵa kóndirgen.
Alaida alynǵan qarajatty ýáde etilgen maqsatqa jumsamai, óz qajetine paidalanǵan.
Is materialdaryna sáikes, jábirlenýshilerdiń biri eki bólmeli páterin kepilge qoiyp, bankten 16 million teńge nesie alǵan. Sottalýshy nesieni ózi ótep, úsh bólmeli páter alyp beretinin aitqan. Alǵashynda birneshe ai tólem jasaǵanymen, keiin bailanysyn úzip, tólemdi toqtatqan. Sonyń saldarynan jábirlenýshi 9 million teńgeden astam shyǵynǵa ushyraǵan.
Taǵy bir epizodta áiel jábirlenýshiniń jubaiynyń dekrettik tólemin kóbeitip berýge ýáde etip, 5 million teńgeden astam qarajatty iemdengen.
Prokýratýranyń málimetinshe, alaiaqtyń áreketinen 60-tan astam adam zardap shegip, olarǵa keltirilgen jalpy materialdyq shyǵyn 500 million teńgeden asqan.
Sot barysynda aiyptalýshy kinásin ishinara ǵana moiyndap, tek keibir epizodtar boiynsha ókinish bildirgen.
Sot úkimimen ol 6 jyl 8 aiǵa bas bostandyǵynan aiyryldy. Sonymen qatar jábirlenýshilerdiń materialdyq shyǵyndy óndirý týraly azamattyq talaptary tolyq qanaǵattandyryldy.
Úkim zańdy kúshine endi.
