6 sáýirden bastap qazaqstandyq mektepter qashyqtan oqytýǵa kóshedi. Bul týraly búgin Ortalyq kommýnikatsiialar qyzmetindegi brifingte QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«2020 jyldyń 6 sáýirinen bastap qazaqstandyq mektepter qashyqtan oqytýǵa kóshedi. Qazir Bilim jáne ǵylym ministrligi uiymdastyrý tetikterin pysyqtaýda. Bul jónindegi barlyq jańalyqtardy jaqyn ýaqytta habarlaimyz. Sondyqtan túsinistik tanytyp, resmi málimdemeni kútýdi suraimyz. Qazir mektepter men muǵalimderdi suraqtyń astyna alyp, aiyptaýdyń reti joq. Bul másele Úkimettiń quziretinde. Biz barlyǵyn aldyna ala habarlaimyz», - dedi Dáýren Abaev.
Onyń atap ótýinshe, osyǵan orai qosymsha shara retinde «Elarna» men «Balapan» tele arnalarynan oqýshylarǵa arnalǵan video sabaqtar kórsetiledi.
«Biraq, bul negizgi emes, qosymsha shara. Osyny qaitalap aitqym keledi. Atalǵan video sabaqtardy Bilim jáne ǵylym ministrligi daiyndaǵan. Olar «Balapan» telearnasynda qazaq tilinde, al «Elarnada» orys tilinde kórsetiledi», - dedi ministr.
