Foto: Instagram.com
Belgili prodiýser Aisáýle Ábilda túsirilim tobyna ádiletsiz aiyp taqqan politsiia qyzmetkerlerine shaǵymdandy, dep habarlaidy Ult.kz SMARTNEWS.KZ basylymyna silteme jasap.
Bul týraly ol jelidegi paraqshasynda jetkizdi.
Rejisser Murat Esjan men onyń jubaiy ári prodiýser Aisáýle Ábilda elge «Abai joly», «Ahmet. Ult ustazy» jáne «Mirjaqyp. Oian, qazaq» syndy tarihi telehikaialar arqyly tanylǵan. Qazir erli-zaiyptylar «Qara altyn» kórkem filmin túsirip jatyr. Alaida túsirilim kezinde olar kútpegen jaǵdaiǵa tap bolǵan.
Aisáýle Ábildanyń aitýynsha, 5 qazan kúni Almatyda ótken túsirilim barysynda politsiia qyzmetkerleri túsirilimdi toqtatyp, film rekviziti retinde paidalanylǵan eski memlekettik nómirleri bar kólikterge hattama toltyrǵan.
«Biz 2004 jyldy beineleitin sahna túsirip jatqan edik. Sol kezeńge sai kólikterge sol jyldardaǵy nómirdi taqtyq. Politsiia qyzmetkerleri kólikterdi toqtatyp, ruqsat qaǵazdarymyzdy tekserdi. Bizde Almaty qalalyq mádeniet basqarmasynan jáne Politsiia departamentinen alynǵan ruqsat hattar bar edi. Soǵan qaramastan, olar júrgizýshilerdi bir táýlikke qamap, bir jylǵa kólik júrgizý quqyǵynan aiyrdy», – dep jazdy prodiýser áleýmettik jelide.
Aisáýle Ábildanyń sózinshe, politseiler ákimshilik kodekstiń 590-babynyń 4-tarmaǵyn («jalǵan memlekettik nómir taǵý») negizge alǵan. Biraq túsirilim tobynyń eshqandai qylmys jasaý nieti bolmaǵan, nómirler tek rekvizit retinde paidalanylǵan.
«Bizdiń maqsatymyz – kino túsirý. Biz 60 adammen kún-tún demei jumys istep júrmiz. Munyń bári týraly memlekettik organdarǵa aldyn ala habarlaǵanbyz. Biraq politseiler eshteńeni eskermesten, hattama toltyryp, júrgizýshilerdi qamap tastady. Al sot bolsa, meniń qatysý týraly ótinishimdi qaramastan, onlain ótkizip jiberdi», – dedi ol.
Prodiýserdiń aitýynsha, bul jaǵdaidan keiin úsh júrgizýshi jumyssyz qalyp, olar óz shyǵyndary úshin túsirilim tobynan 6 million teńge ótemaqy talap etip otyr.
«Bizdiń politsiianyń basty maqsaty – qorǵaý emes, qorqytý siiaqty. Qanshama adamnan kóligi urlanyp, aqsha joǵalyp jatqanda, olar kino túsirip júrgenderdi ustap máz. Bizge ádiletti sheshim men kásibi kózqaras jetispeidi», – dep qorytyndylady prodiýser.
Oqiǵaǵa bailanysty Almaty qalalyq Politsiia departamenti ázirge resmi túsinikteme bergen joq.
