Búgin QR Úkimetiniń baspasóz alańynda ótken baspasóz konferentsiiasynda «Qazaqtelekom» AQ basqarma tóraǵasy Qýanyshbek Esekeev Qazaqstanda 5G engizýdiń artyqshylyqtary týraly aityp berdi, dep habarlaidy "Ult aqparat".
Q. Esekeevtiń aitýynsha, 5G qosqannan keiin kóptegen qyzmetter qoljetimdi bolady. Eń aldymen, beinekonferentsiia bailanysy, E-commerce jáne basqa da qyzmetter ashyq bolady.
«5G — bul múldem basqa jyldamdyq. Shamamen 30 ese artyq. Elestetýdiń ózi ońai emes, osy másele arqyly kóptegen nárselerdi jasaýǵa bolady, máselen: avtokólikti qashyqtan basqarýdan bastap, qashyqtan meditsinamen ainalysý. 5G kóptegen ózgeris alyp keledi. Eske túsirip ótsek, 4G qosylǵannan keiin bizdiń ómirimizge Instagram men Feisbýk endi. Sol sekildi 5G qosylǵannan keiin jańa qyzmetter paida bolmaq», — dep málimdedi «Qazaqtelekom» AQ basqarma tóraǵasy.
Buǵan qosa, Q. Esekeev 5G jelilerin engizgennen keiin qarqyndy túrde dami bastaityn salalardy atap ótti.
«Tehnologiialar keledi, sóitip ónerkásip, elektrondy kommertsiia odan ári aiqyn dami bastaidy. 5G túrli salalarda birneshe revoliýtsiialyq ózgeris engizedi dep oilaimyn. Alǵashqy sala – kólik salasy bolady. Sebebi mundai jyldamdyqtar kólikte óte qolaily. 5G engizilgennen keiin 2-3 negizgi salanyń túbegeili ózgergenin baiqaityn bolamyz», — dedi Q. Esekeev.
«Qazaqtelekom» AQ basqarma tóraǵasy búgingi tańda 5G jelisin engizý birneshe túrli óndirýshide testileýden ótkizilip jatqanyn aitty.
«Árqaisysy óziniń standartyn, jelisiniń múmkindikterin, óziniń jyldamdyq sipattamalaryn usynady. Biizdiń bir vendormen shektelgimiz kelmeitini túsinikti. Bizdiń kompaniianyń strategiiasy – vendorlyq táýelsizdik. Biz tikelei tehnologiialyq táýeldilikte bolmaýy úshin kóptegen san alýan vendorlarymyzdyń bolýyn qarastyratyn bolamyz», — dep túsindirdi Q. Esekeev.
Sonymen qatar, Q. Esekeev Qazaqstanda jańa eSIM tujyrymdamasynyń jasalýy týraly aitty. Onyń aitýynsha, chip túrindegi SIM-kartanyń kádimgi túri baǵdarlamalyq sheshimge aýystyrylatyn bolady. Bul tujyrymdamany qazir uialy bailanys operatorlary retteýshimen pysyqtap jatyr.
«Men taiaý arada biz SIM-kartany uialy telefonǵa chipti salmastan, baǵdarlamalyq jasaýǵa bolatyn eSIM alǵashqy jobalaryn usynatyn bolamyz dep oilaimyn. 5G paida bolǵan soń bul tehnologiianyń negizgi bóligi eSIM negizinde engiziletin bolady dep oilaimyn», — dedi «Qazaqtelekom» AQ basqarma tóraǵasy.
Aýyl turǵyndary úshin «aqyldy aýyl» jáne «bultty» beinebaqylaý tárizdi tehnologiialar qashan qoljetimdi bolady degen suraqqa Q. Esekkev bir jyl ishinde aýyldardy keńjolaqty Internetpen qamtyǵan soń bul múmkin ekenin jetkizdi.
«Biz qalada sońǵy úsh jylda jiyntyqty beinebaqylaýdy belsendi túrde damyttyq. Aýylǵa joǵary jyldamdyqty internet pen Qazaqtelekomnyń kelýimen ol túbegeili ózgeredi dep oilaimyn. Bul – elektrondy kommertsiia salasyndaǵy ózgerister bolmaq. Eń aldymen, sebebi, aýyl turǵyndaryna kommertsiialyq resýrstar teń quqyly qoljetimdi bolady. Beinebaqylaý men basqa da servis túrleri qosylǵannan keiin bir jyl ishinde aýyldarǵa da jetedi dep oilaimyn. Bastysy, jyldamdyq pen qosylǵan abonentterdiń sany», — dedi Q. Esekeev.
