Biylǵy qazan aiynda Egipette Halyqaralyq elektrbailanysy odaǵynyń otyrysynda 5G jelileriniń adam densaýlyǵyna tigizetin áserine taldaý jasalady. Bul týraly QR tsifrlyq damý, innovatsiialar jáne aeroǵarysh ónerkásibi ministri A. Jumaǵaliev QR Úkimetindegi baspasóz konferentsiiasy barysynda málimdedi, dep habarlaidy "Ult aqparat".
A. Jumaǵaliev habarlaǵandai, qazan aiynda Egipette Halyqaralyq elektrbailanysy odaǵynyń otyrysy ótedi.
«Osy Búkilálemdik otyrysta naqty standarttar anyqtalady. Standart 2021 jyly túpkilikti bekitiledi degen boljam bar», — dedi ministr.
Sonymen qatar, A. Jumaǵaliev 5G tehnologiialarynyń standartyn anyqtaǵan kezde onyń adam densaýlyǵyna áser etý máselesi negizgi bolatynyna senim bildirdi.
«Densaýlyqqa qatysty barlyq máseleler tiisti synaqtardyń negizinde taldanady. Halyqaralyq elektrbailanysy odaǵynyń standartty bekitýi densaýlyq elementterine negizdeletinine senimdimin. Sebebi densaýlyqqa keri áser etetin tehnologiialardy eshkimniń de engizgisi kelmeitini anyq», — dedi tsifrlyq damý, innovatsiialar jáne aeroǵarysh ónerkásibi ministri.
Sonymen qatar, baspasóz konferentsiiasy barysynda A. Jumaǵaliev Qazaqstan ekonomikasyn tsifrlandyrý úshin 5G-di engizýdiń mańyzdylyǵyna toqtaldy.
«Bul óte mańyzdy másele. Bul búgingi kún tártibindegi barlyq tehnologiialyq máselelerdi sheshetin tehnologiia», — dedi ministr.
5G tehnologiialary 4G tehnologiialarymen salystyrǵanda joǵary ótkizý qabiletin qamtamasyz etedi, bul uialy bailanysqa keń jolaqty qoljetimdilikti qamtamasyz etedi, sonymen qatar device-to-device rejimderin qoldaný, qurylǵylar arasyndaǵy senimdi iri masshtabty bailanys júieleri, qysqa kidiris ýaqyty, internet jyldamdyǵy 1-2 Gbit/s bastap, 4G jabdyqtaryna qaraǵanda batareia qýatynyń az shyǵyny — osynyń bári zattar internetiniń damýyna qolaily áser etedi.
Baiqaýymyzsha, álemde áreket etip turǵan býyndy engizgennen keiin 10 jyldan keiin uialy bailanystyń jańa býynyn tanystyrý úrdisi qalyptasqan. Uialy jelilerdiń alǵashqy býyny 1980 jyldardyń basynda paida boldy. 10 jyldan keiin álemge jetildirilgen tehnologiialar — 2G tanystyryldy. 2000 jyldardyń basynda paidalanýshylar 3G joǵary jyldamdyqty internetine qol jetkizdi, al 2009 jyly joǵary jyldamdyqty internettiń sońǵy býyny engizildi. Endi mine 10 jyldan keiin álemde múldem jańa 5G tehnologiialary qoljetimdi bolady.
