Elordada «Qazaqtelekom» AQ-tyń uiymdastyrýymen halyqaralyq «3 rd IoT Forum Kazakhstan» sharasy ótip jatyr, dep habarlaidy "Ult aqparat".
Shara barysynda kompaniia IoT, Smart siti, Big data, beinebaqylaý boiynsha jobalardyń sheshimin usynbaq. Forým alańynda otandyq jáne sheteldik sarapshylar memlekettik qyzmetti tsifrlandyrý, óndiristi tehnologiialyq transformatsiialaý, TÚKSh salasyn avtomattandyrý, qarjylyq tehnologiialardy damytý máselelerin talqylamaq.
Halyqaralyq forýmda sóz bastaǵan QR Tsifrlyq damý, innovatsiialar jáne aeroǵarysh ónerkásibi vitse-ministri Daryn Tuiaqovtyń aitýynsha, IOT forým – tsifrlandyrý men úzdik tehnologiialardy engizý isindegi salalyq ári iri is-shara. Keiingi úsh jylda qatarynan úsh márte ótkizilgen halyqaralyq forýmda álemdik sarapshylar oilaryn ortaǵa salyp, ortalyq jáne aimaqtyq memlekettik uiymdardyń basshylary tájiribe jinap qaitady.
«Eldiń áleýmettik-ekonomikalyq damýynda tsifrlandyrýdyń róli sheshýshi mańyzǵa ie. Damyp kele jatqan nemese damyǵan memleketter tsifrlandyrý isin jeteleýge múmkindik bererlik qajetti saiasi tetikterdi ázirlei bilýi tiis. Kún tártibinde tsifrlyq mindetterdi oryndaý úshin Elbasy «Tsifrlyq Qazaqstan» baǵdarlamasyn bekitken bolatyn. Baǵdarlama ekonomikanyń san-salasy men memlekettik qyzmetterdi tsifrlandyrýdy, joǵary jyldamdyqty jáne qorǵalǵan teleproektsiialyq infraqurylymdy damytýǵa baǵyttalǵan», - deidi ol.
Vitse-ministrdiń aitýynsha, álemdik tehnologiia bir jerde toqtap turmaidy. Birqatar memleketter 5G internet jelisin engizý máselesin qyzý talqylap jatyr.
«Jýyrda ǵana Mysyrdaǵy Shar-El-Sheihte úlken konferentsiia ótkizilip, 5G internet jelisin engizý máselesi talqylandy. Negizinen 5G ekonomikanyń, aqyldy qalalardyń damýyna serpin berip, jańa mamandyqtardy ashady. Qazaqstannyń aimaqtaǵy mobildik trafikti belsendi qoldanatyn elderdiń biri ekenin eskere otyryp, el azamattarynyń joǵary jyldamdyqty internetke suranysy joǵary ekenin ańǵarýǵa bolady. Qazirgi tańda Qazaqstan bul tehnologiiany engizip jatqan elderdiń biri. Biyldyń ózinde Nur-Sultan men Almatyda 5G testilik rejimnen ótti. Qazan aiynda Shymkentte de testileý júrgizildi», - dedi ol.
Daryn Tuiaqov óz sózinde joǵary jyldamdyqty internet jelisin testileý ártúrli diapazondyq jiilikte júrgizilgenin aitady.
«Búgingi kúni 5G jelisin kommertsiialyq turǵyda engizý máselesi pysyqtalýda. Bailanys operatorlarymen birge bul másele talqylanyp jatyr. 5G – jai ǵana uialy bailanys qana emes, telemeditsina, óndiristi tsifrlandyrý, pilotsyz kólikti basqarý salalaryn keńinen qamtidy», - dedi ol.
