Qazaqstanda «Dármek» jedel-profilaktikalyq is-sharasy barysynda 28 myńǵa jýyq qaýipti dárilik zattyń ainalymyna shekteý qoiyldy. Tekserý kezinde 249 quqyq buzýshylyq anyqtalǵan, dep habarlaidy ult.kz.
IIM-niń málimetinshe, operatsiianyń kezekti kezeńi 21-25 qyrkúiek aralyǵynda ótti. Politsiia qyzmetkerleri densaýlyq saqtaý organdarymen birlesip, quramynda psihotroptyq jáne kúshti áser etetin zattary bar dárilerdiń ainalymy talaptarynyń saqtalýyn tekserdi.
Shara barysynda 1500-den astam meditsinalyq mekeme men dárihana, sondai-aq 142 ónerkásiptik kásiporyn tekserildi.
Politsiia ásirese kúshti áser etetin preparattardy retseptsiz satý, onyń ishinde olardy kámeletke tolmaǵandarǵa ótkizý faktilerine nazar aýdarǵan.
Tekserý barysynda birneshe zań buzýshylyq anyqtaldy.
Petropavlda júzý jattyqtyrýshysy ustalyp, odan kúshti áser etetin 56 tabletka tárkilendi.
Túrkistandaǵy dárihanalardyń birinen mundai preparattardy tiisti litsenziiasyz satý faktisi anyqtalǵan. Nátijesinde 5 myńnan astam tabletka tárkilendi.
Oralda litsenziialaý talaptaryn buzýǵa bailanysty 500 tonna tuz qyshqylynyń ainalymyna shekteý qoiyldy.
Sonymen qatar IIM himiialyq zattar men prekýrsorlardyń zańdy ainalymnan zańsyz ainalymǵa ótýine jol bermeý maqsatynda baqylaý júrgizdi. Nátijesinde 675 tonna túrli prekýrsordyń ainalymy shektelip, 90 zańdy tulǵa ákimshilik jaýapkershilikke tartyldy.
IIM málimetinshe, 2026 jylǵy 1 qańtardan bastap Qazaqstanda kúshti áser etetin zattardy zańsyz iemdený, saqtaý jáne tasymaldaý úshin qylmystyq jaýapkershilik engizilgen. Mundai áreketter úshin bes jyldan 15 jylǵa deiin bas bostandyǵynan aiyrý jazasy qarastyrylǵan.
