2026-2027 oqý jylyna arnalǵan Qazaqstan Respýblikasynyń azamattyǵy joq shetel azamattaryna, onyń ishinde qazaq ultynyń ókilderine arnalǵan memlekettik stipendiialyq baǵdarlamasy aiasyndaǵy konkýrstyq irikteý aiaqtaldy. Baiqaý qorytyndysy boiynsha 550 stipendiia iegerinen turatyn negizgi tizim bekitildi, dep habarlaidy ult.kz.
Atalǵan baǵdarlama 2019 jyldan beri júzege asyrylyp keledi jáne halyqaralyq akademiialyq yntymaqtastyqty damytýǵa, sondai-aq daryndy sheteldik jastardy Qazaqstannyń jetekshi joǵary oqý oryndarynda bilim alýǵa tartýǵa baǵyttalǵan.
2026 jyly baǵdarlama sheńberinde:
- bakalavriat baǵdarlamalary boiynsha oqýǵa – 490 bilim berý granty;
- magistratýra baǵdarlamalary boiynsha oqýǵa – 50 grant;
- doktorantýra baǵdarlamalary boiynsha oqýǵa – 10 grant bólindi.
Konkýrstyq irikteýge álemniń 71 elinen 16 098 úmitker qatysty. Qatysýshylardyń edáýir bóligin Qazaqstan Respýblikasynyń azamattyǵy joq qazaq ultynyń ókilderi – qandastar qurady. Atalǵan sanattaǵy azamattarǵa arnalǵan baǵdarlamany iske asyrý Qazaqstanda sapaly bilim alýǵa qoljetimdilikti keńeitýge jáne tarihi otanymen bailanysty nyǵaitýǵa yqpal etedi.
Baǵdarlamany iske asyrýǵa 886 bilim berý baǵdarlamasyn usynǵan Qazaqstannyń 27 joǵary oqý orny qatysady. Stipendiia iegerleriniń basym bóligi Sh.Ýálihanov atyndaǵy Kókshetaý ýniversitetinde, Astana IT University-de, Q.I.Sátbaev atyndaǵy Qazaq ulttyq tehnikalyq zertteý ýniversitetinde, L.N.Gýmilev atyndaǵy Eýraziia ulttyq ýniversitetinde, Abylai han atyndaǵy Qazaq halyqaralyq qatynastar jáne álem tilderi ýniversitetinde jáne elimizdiń basqa da joǵary oqý oryndarynda bilim alady.
Biyl baǵdarlamaǵa qatysýshylardyń geografiiasy aitarlyqtai keńeidi. Eger 2025 jyly oqýǵa usynylǵandar qatarynda 26 eldiń ókilderi bolsa, 2026 jyly bul kórsetkish 49 memleketke deiin artty. Eń kóp ótinim Palestina, Indoneziia, Resei Federatsiiasy, Ózbekstan Respýblikasy jáne Aýǵanstannan kelgen úmitkerlerden tústi. Alǵash ret stipendiia iegerleri qatarynda AQSh, Italiia, Germaniia, Maldiv Respýblikasy jáne Koreia Respýblikasy azamattary bar.
Baǵdarlamany iske asyrý Qazaqstannyń Ortalyq Aziiadaǵy bilim berý ortalyǵy retindegi halyqaralyq bedelin nyǵaitýǵa, akademiialyq yntymaqtastyqty keńeitýge jáne qazaqstandyq joǵary oqý oryndaryna sheteldik stýdentterdi tartýǵa yqpal etedi.
