52 myńnan astam kásipkerlik sýbektisiniń jobalaryna qarjylyq qoldaý kórsetiledi. Bul týraly Ortalyq kommýnikatsiialar qyzmetindegi baspasóz máslihatynda QR Ulttyq ekonomika ministri Áset Erǵaliev aitty, dep habarlaidy QazAqparat.
Ministrdiń atap ótýinshe, Kásipkerlikti damytý jónindegi ulttyq jobanyń «Kásipkerlerdiń ósýin jedeldetý» baǵyty boiynsha kásipkerlerge ákimshilik júktemeni azaitý josparlanǵan.
«Memlekettik organdardyń aqparattyq júielerin «Bizneske arnalǵan úkimet» portalyna integratsiialaý 2025 jyly ShOB sýbektileri úshin kórsetilgen memlekettik qyzmetter úlesin 40 paiyzǵa deiin jetkizýge múmkindik beredi. Kreditter boiynsha syiaqy mólsherlemesiniń bir bóligin sýbsidiialaý jáne kepildik berý usynylady. Jańa biznes-ideialardy iske asyrý úshin granttar bólý aýylda 55 myń jańa kásipkerlik sýbektisin qurýǵa múmkindik beredi», - dedi ol.
Sonymen birge ministr qarjylyq qoldaý is-sharasy kásipkerlik sýbektileriniń 52 myńnan astam jobasyna usynylatyndyǵyn aitady.
«Ulttyq taýar ótkizý jelisin qalyptastyrý boiynsha jumys jalǵasady. Bólý, satý jáne saqtaýǵa arnalǵan 24 kóterme-taratý ortalyǵyn qurý; 5 transshekaralyq saýda ortalyǵyn qurý men jańǵyrtý; sondai-aq, statsionarlyq formatta 103 saýda nysanyn jańǵyrtý kózdelýde. Nátijesinde kópformatty saýda nysandarynyń sany 6-dan 132 birlikke deiin artady», - dedi Áset Erǵaliev.
