Aqtóbede sot 52 adam ishinde tiridei janyp ketken avtobýstyń úsh júrgizýshisin eki aiǵa qamaýǵa alý týraly sheshimdi bekitti. Olarǵa kólik quralyn paidalanýdyń erejesin buzdy degen aiyp taǵylyp otyr, dep habarlady kaz.tengrinews.kz jergilikti "Diapazon" gazetine silteme jasap.
Tergeýdiń nusqasy boiynsha, jolaýshylar dánekerleý shamynyń kómegimen jylynǵan. Ony birneshe saǵat qoldanǵandyqtan, avtobýstyń salony gaz ben benzin qospasyna tolǵan. Baiqaýsyzda benzin quiylǵan ydystan benzin tógilip, órt shyqqan. Júrgizýshiler "Avtomobildi, trolleibýsty, tramvaidy ne basqa da mehanikalyq kólik quralyn basqaratyn adamnyń jol júrisi nemese kólik quraldaryn paidalaný qaǵidalaryn buzýy, abaisyzda eki nemese odan da kóp adamnyń ólimine ákep soqqan is-áreket" baby boiynsha kúdikke ilinip otyr. Olar besten on jylǵa deiin sottalýy múmkin.
Nurjan Qyrǵyzbaevtyń qorǵaýshysy ony kepilmen bosatýdy surap, onyń tergeýge kedergi bolmaitynyn nemese eshqaida qashyp ketpeitinin aityp túsindirdi. Basty júrgizýshisi Maqsat Pernebekov ózine taǵylyp otyrǵan aiypty moiyndamady. Onyń aitýynsha, oqiǵa bolǵan kezde ol uiyqtap jatqan jáne rýlde ol bolmaǵan. Ol sottan bas bostandyǵyn aiyrmaýdy surady.
Úshinshi júrgizýshi Barat Tańatov ol kúni jolaýshy retinde jolǵa shyqqan. Ol da túrmege jappaýdy surap, jeti balasynyń bar ekenin, olardyń beseýi kámeletke tolmaǵanyn jáne olardy asyraityn eshkimniń joq ekenin aitty. Ol da kepilmen bosatýdy surady. Pernebekovtiń ápkesi inisiniń bul oqiǵanyń qurbany ekenin aitty. "Ol da ózgeler siiaqty zardap shekti, baqytyna orai tiri qaldy. Endi ony sottap jatyr, bizge kórsetpeidi de. Aýrýhanada da, sotta da sóilestirmedi. Is júrgizýshilerdi kinálaýmen shektelmei, ádiletti jáne aýqymdy zertteledi dep úmittenemin. Maqsatty tiri qalǵany úshin ǵana sottap jatqandai seziledi", - dedi Nurshat Pernebekova.
Onyń aitýynsha, Maqsat sońǵy jyldary Qazanǵa avtobýsty jii júrgizip barǵan. Avtobýs basqa adamǵa tielisi, ol adam ár reis úshin júrgizýshige 60 myń tólegen. Nurshattyń aitýynsha, Maqsat otbasyndaǵy alty balanyń bireýi. Onyń ózinde úsh bala bar.
Eske sala keteiik, 18 qańtar kúni Aqtóbe oblysy Yrǵyz aýdanynda 57 adam otyrǵan avtobýs janyp ketti. TJ boiynsha komitettiń málimettinshe, bes adam órtenip jatqan avtobýstan qashyp úlgergen. 52 adam sol jerde tiridei janyp ketti. Avtobýs Ońtústik Qazaqstan oblysynan Qazanǵa ketip bara jatqan.
