Ulttyq bank búginnen bastap 2006 jylǵy úlgidegi nominaly 500 teńgelik banknottardyń ainalymda bolý kezeńiniń aiaqtalǵanyn málimdedi, dep habarlaidy "Ult aqparat".
Eski banknottardyń ainalymyna qatysty aqparattar osy kezge deiin de birneshe ret BAQ betterinde jazylyp, jariialandy. Ulttyq bank aldaǵy ýaqytta bul máseleniń qalai retteletinin túsindirdi.
2020 jyldyń 10 maýsymynan keiin:
-
ekinshi deńgeidegi bankter qatar ainalys kezeńi aiaqtalǵan kúnnen bastap 12 ai ishinde eski úlgidegi banknottardy qabyldaidy jáne qoldanystaǵy aqsha belgilerine aiyrbastaidy;
-
Ulttyq banktiń filialdary ekinshi deńgeidegi bankterdiń qabyldaý jáne aiyrbastaý merzimi aiaqtalǵan soń taǵy 3 jyl ishinde eski úlgidegi banknottardy qabyldaidy, sondai-aq olardy jańa úlgidegi aqsha belgilerine aiyrbastaidy.
"Osylaisha, 2020 jyldyń 10 maýsymynan keiin 2006 jylǵy úlgidegi nominaly 500 teńgelik banknottar zańdy tólem quraly bolyp tabylmaidy", – delingen baspasóz habarlamasynda.
Sonymen birge, 2017 jylǵy úlgidegi nominaly 500 teńgelik banknottar ainalysta bolady jáne tólemderdiń barlyq túrleri boiynsha Qazaqstan aýmaǵynda kórsetýli quny boiynsha, sondai-aq bank shotyna esepke alý jáne aýdarý úshin qabyldaýǵa, barlyq bankter men ulttyq poshta operatory shektemesten usaqtaýǵa jáne aiyrbastaýǵa mindetti bolyp qala beredi.
Aita keteiik, eski jáne jańa úlgilerdegi banknottardy qatar ainalysy kezeńinde 2006 jylǵy úlgidegi nominaly 500 teńgelik banknottardy qabyldaýdan bas tartý faktileri týyndaǵan jaǵdaida, tiisti sharalar qabyldaý úshin ulttyq banktiń aýmaqtyq filialyna ótinish jasaý qajet.
