Elordada órt saldarynan 5 balanyń qaza bolýyna bailanysty qylmystyq is qozǵaldy. Bul týraly búgin Úkimet otyrysynan keiin QR Ishki ister ministri Qalmuhanbet Qasymov aitty, dep habarlaidy QazAqparat tilshisi.
«Biz oryn alǵa oqiǵa faktisi boiynsha qylmystyq is qozǵadyq. Saraptama júrgizý qajet. Órttiń shyǵýyna jylytý peshi sebep bolǵan», - dedi ministr BAQ ókilderiniń saýalyna orai.
Onyń aitýynsha, bul órt shyǵýynyń aldyn ala sebebi ǵana. Al naqty sebep arnaiy júrgizilip jatqan saraptamalardyń qorytyndysynan keiin belgili bolady. Osy rette BAQ ókilderi ministrden «ata-analyq mindetin durys atqarǵan degen jeleýmen balalardyń ákesi men sheshesine qylmystyq is qozǵalýy múmkin be?» dep suraǵan edi.
«Bul rette ata-ananyń qandai mindettemesi bolýy múmkin? Menińshe, bul ondai jaǵdai emes. Biz qylmystyq isti fakti boiynsha qozǵadyq. Óitkeni, saraptama júrgizý qajet. Órttiń shyǵý sebebin anyqtaǵymyz keledi», - dedi Q.Qasymov.
Búgingi Úkimettiń selektorlyq rejimdegi otyrysynda QR Premer-Ministri Baqytjan Saǵyntaev órtten qaza tapqan 5 balanyń ata-anasyna kóńil aitqan bolatyn.
Eske sala keteiik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úi alabynda jeke úidiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.
Olardyń kishisi nebári 11 ailyq sábi edi. Órt kezinde bes balanyń ata-anasy túngi jumysta bolǵan.
.jpeg)