foto: egemen.kz
Ferroqorytpa zaýytyndaǵy apatqa qatysty jaýapty organdar apparattyq keńeste jaǵdaidy baiandady, -dep habarlaidy "Ult Aqparat".
Ózderińiz biletindei, ferroqorytpa zaýytynda shtattan tys jaǵdai bolyp, ókinishke qarai, 8 qyzmetker zardap shekti. Qazir barlyǵyna tolyq kólemde qajetti meditsinalyq kómek kórsetilip jatyr. Men zardap shekkenderdiń týystarymen jeke kezdestim, dárigerlermen de sóilestim. Meditsina qyzmetkerleri qoldan kelgenniń bárin jasap jatyr, – dedi oblys ákimi Ermaǵanbet Bólekpaev.
Densaýlyq saqtaý basqarmasynyń basshysy Bibigúl Tólegenovanyń aitýynsha, zardap shekken bes adamnyń jaǵdaiy óte aýyr, úsheýiniń jaǵdaiy aýyr jaǵdaida. Shokqa qarsy barlyq keshendi terapiia júrgizilip jatyr.
Aita ketsek, YDD Corporation ferroqorytpa zaýytynda bolǵan oqiǵa faktisi boiynsha QR QK 156-babynyń 2-bóligi boiynsha «Abaisyzda densaýlyqqa aýyr ziian keltirýge ákep soqqan eńbekti qorǵaý erejelerin buzý» babyna sai qylmystyq is qozǵaldy.
Eńbek zańnamasy sheńberinde bolǵan jaǵdaidyń sebepteri men mán-jailaryn tekserý úshin arnaiy komissiia quryldy.
Komissiia quramyna barlyq ýákiletti memlekettik organdardyń ókilderi kirdi. Jumystar birinshi kúnnen bastalyp ketti. Ár ókil óz baǵytyn pysyqtap jatyr. Bastapqyda oqiǵa bolǵan jer tekserilip, jazataiym oqiǵanyń kýágerlerine saýalnama júrgizildi. Endi tehnikalyq qujattamamen tanysý júrgizilip jatyr. Biz kún saiyn jumys istep jatyrmyz, – dedi eńbek inspektsiiasy basqarmasynyń basshysy Murat Qaraqekilov.
Tergeý qorytyndysy boiynsha qorytyndy jasalady.
Bul jumysty sizder barlyq jaýapty memlekettik organdarmen, sonyń ishinde quqyq qorǵaý organdarymen tyǵyz yntymaqtastyqta júrgizýlerińiz kerek. Túbegeili jáne obektivti túrde! – dep atap ótti Ermaǵanbet Bólekpaev.
