Germaniialyq BioNTech kompaniiasy men onyń amerikalyq áriptesi Pfizer óndirgen 5-11 jas aralyǵyndaǵy balalarǵa arnalǵan koronavirýsqa qarsy vaktsina birneshe aptanyń ishinde paidalanýǵa berilýi múmkin. Bul týraly Der Spiegel basylymyna juma kúni BioNTech meditsinalyq zertteýler jónindegi direktory Ózlem Tiýrechi málim etti, dep habarlaidy QazAqparat TASS agenttigine silteme jasap.
«Jaqyn aptalarda biz 5-11 jas aralyǵyndaǵy balalarǵa júrgizilgen zertteý nátijesin álem biligine usynamyz, sonymen qatar osy jas sanaty úshin vaktsinany maquldaýǵa ótinish beremiz. Atap aitqanda, Eýropada. Biz qazirdiń ózinde óndiriske daiyndalyp jatyrmyz», - dedi Tiýrechi.
Oǵan qosa, Tiýrechi preparattyń eresekterge arnalǵan túrinen esh aiyrmasy joq ekenin, tek balalarǵa arnalǵan vaktsina dozasynyń kishkentai bolatynyn atap ótti.
Óz kezeginde BioNTech-tiń ortaq quryltaishysy, bas direktory Ýgýr Shahin qazirgi kezde zertteý nátijesiniń daiyn ekenin jáne biliktiń bekitýi úshin qadam jasaý kerek ekenin málimdedi.
«Bári josparlaǵanymyzdai kele jatyr», - dedi Shahin.
Sonymen qatar ol jyldyń sońynda alty aidan asqan balalar arasyndaǵy zertteýler nátijesi daiyn bolatyny aityldy.
Mamyrdyń sońynda Eýropa dári-dármek agenttigi Pfizer men BioNTech birigip óndirgen koronavirýsqa qarsy Comirnaty vaktsinasyn 12-15 jasar jasóspirimder arasynda paidalanýǵa ruqsat berdi.
Osylaisha, bul preparat - osy jas sanatyndaǵy adamdar arasynda qoldanýǵa ruqsat etilgen koronavirýsqa qarsy birinshi vaktsina bolyp otyr.
